uMthunywa
YiNtatheli kaMthunywa
UMDLALI weHighlanders ovala sengathi uthunyiwe uBukhosi ‘Khosera’ Ncube ubike ukuba abagadli abasoze badlule lula kuye ngoba usezimisele ukuthi avimbe kuze kuyovalwa.
UNcube osekhange ilihlo likamqeqetshi uErol Akbay usengumdlali othenjiweyo kuTshilamoya okokuthi usedlala imidlalo yonke kungabi loyedwa osolayo.
Umdlali lo ogijima ngesokudla ngemuva kwenkundla, ufike kuqembu elidala wabamba indawo le ngazo zonke.
Uthembise uzulu olandela iBosso ukuba amanye amaqembu azathwala avuzayo.
“Imidlalo eseleyo kumele ibelenguquko ngoba sifuna ukunqoba.”
“Ngizavala njengemvimbi ethenjiweyo, ngihlose ukuthi ngivikele iqembu lingahlohlwa kalula. Ukuzimisela kwami kuzabonakala enkundleni, angifuni ukuthi kuphelele ngokukhulula kuphela.,” kutsho umdlali lo.
Umdlali lo uthe okwenza azitshele ukuthi iHighlanders izaguqula umdlalo, iqale ukuthabisa abalandeli bayo yikuthi ngemva komdlalo wabo leDynamos, bavumelana njengabadlali ukwenza ngcono.
“Kusukela khathesi wonke umdlali ufuna ukuthi iqembu lenze kahle, sikhohlwe ngokudluleyo.”
UNcube ubalelwa kubadlali abalekusasa enhle kuBosso njalo uyingxenye yalabo abathwele amathemba wokuthi iqembu alisoke libulawe.
Laye uyazi ukuthi ulomthwalo wokuthabisa umphakathi.
“Ngiyazi sibili ukuthi abantu bakhengele thina esisakhulayo. Ikusasa lami likuleli qembu.Ukudlala kwami kuhle, yikuphumelela kwalo,” nguNcube lo.
Abazali balumdlali labo babona ngaso linye ukuthi umfana uzakubayisibane seHighlanders.
Uyise uLovemore Ncube uthe wakhetha ukuthi athumele uBukhosi kuHighlanders ngoba esazi ukuba uzafika abeyinsika.
“Ngangijwayele ukumbukela uBukhosi esakhula, ibhola wakhula elithakazelela njalo ekwazi ukulidlala.Njengabazali bakhe kuyasithabisa ukuthi usedlalela iqembu esilisekelayo, iHighlanders. Simfisela inhlanhla,” kutsho uyise kaBukhosi.
USibanda waqala ukudlala ibhola esesikolo seChinotimba Primary eFolosi lapho akhulela khona.
