uMthunywa
Yintatheli kaMthunywa
KUBIKWA umdlali wakuleli, owakhulela koBulawayo, owadlala lakuHighlanders uKudakwashe ‘‘Nkembe’’ Mahachi wala ukuyadlalela ezinkulu iOrlando Pirates.
Ukutshaya phansi ngonyawo komdlalo lo oweMamelodi Sundowns obebolekiswe kuLamontville Golden Arrows sekutshiye abaphathi beSundowns bedidekile.
UMahachi, kwakumele aphambane kumgwaqo kaN1 lo-Oupa Manyisa omunye ekhangele eTshwane omunye elibangise eSoweto
UMahanchi wemba phansi wathi angeke ayedlalela iPirates ngoba usazimisele ukuqhubeka edlalela Abafana Bes’thende.
NgoLwesithathu usihlalo wePirates u-Irvin Khoza umemezele ukuthi uManyisa kasekho kuPirates.
Ngokusho komthombo osondelene lodaba lolu, uMahachi akazange elokhu etshona ezintangeni utshele umongameli weSundowns uPatrice Motsepe lomqeqeshi wayo uPitso Mosimane ukuthi akazimiselanga ngokutshiya Abafana Bes’thende.
“Kuthiwa zibamba ziyayeka izikhulu zaMasandawana ngokuthi ngubani omunye ongakwazi ukumshintshanisa loManyisa ngoba uMahachi akayingeni eyokuyadlalela iBucs,” kutsho umfakazi oseduzane lodaba.
Omunye umthombo osondelene lomdlali uthi uMahachi wathola ucingo oluvela kuMosimane emcela ukuthi makenze okulungileyo avume ukuyodlalela Bucs.
“Okunenge kakhulu umdlali lucingo oluvele kuMosimane okuyinto engakaze yenzeke kuye.”
Ethintwa ngalIndaba uThulani Thuswa, isikhulumi seSundowns uqale wahleka intatheli usulu wayiphika wathi akayazi.
“Leyo eyokutshintshaniswa kukaMahachi angiyazi,” kutsho uThuswa.
