uMthunywa
SIQHUBEKA sinanzelela imvunulo yesiNtu eyayivunulwa ngelayizolo. Amanye amagama emvunulo le ayaphica kuthi-ke ezinye zakhona sekwasala imbali nje. Kumaviki edluleyo besinanzelela invunulo le ngokukhathekileyo ukuthi le ivunulwa ngobaba, eyinye njalo ivunulwa ngomama, izolo-ke bekubalulekile ukuthi obaba bagqoke imvunulo eqondane labo kuthi abesifazana labo ngokufanayo. Bekungani lalamuhla lapha abantu asebavunula baphithikanise nje.
Kesikhangele imvunulo engakhethiyo
1. Amanyathela wona avunulwa enyaweni. Enziwa ngesikhumba sesiphaqa senkomo okuyiso esiqinileyo kakhulu ukuze sigcinakale okwesikhathi. Amanyathela la ayesikwa ngokulinganiswa konyawo lomuntu.
2. Isiqhazo ngamacici endulo, isiqhazo-ke babesenza ngogaba lwebele. Siyananzelela kulezinsuku sekungamacici atshiyeneyo agqokwa nxa abantu bezicecele.
3. Izigetsho yimvunulo eyande ukuvunulwa yizangoma zigqokwa eziqakaleni kanye lengalweni. Imvunulo le yenziwa ngesikhumba sembuzi.
4. Imithinsi le yimvunulo eyande ukuvunulwa ngabagidayo yenziwe ngemithinsi etshileneyo ehlanganiswa ngozwezwe nje ukuze yenele ukhalo.
5. Indlukula le yingwane yezangoma eyenziwa ngensiba zentshe. Izangoma ziyivunula ngokuya ngasesiphaqeni njalo ziyivunula nxa kugidwa.
6. Ingala yibuhlalu obuvunulwa yilabo abalamadlozi ayesesatshwa ukubizwa ngamabizo ingala bayeyivunula ekhanda. Lapho iphothwa ingala le kwakungatshaniswa ubuhlalu obumhlophe lobuyinkiwane.
