Isilisa lesifazane

14 Sep, 2017 - 02:09 0 Views

uMthunywa

KUHLELO lwesiNdebele sifunda ukuthi zonke izinto eziphilayo zingehlukaniswa kabili. Kungabakhona isilisa lesifazane. Kujayelekile ukuthi kubekhona ibizo elimele umhlobo webizo kodwa lingachazi ukuba yisilisa kumbe yisifazane. Ibizo elinjalo kuthiwa liveza ubulili bonke, okutsho ukuthi kalehlukanisi isilisa lesifazane.

Nanzi izibonelo zamabizo ayibulili bonke: umuntu, inkukhu, imbuzi, inja, inkomo, njalonjalo. 1. Nxa sifuna ibizo elikhomba isifazane singasebenzisa isijobelelo u – kazi kwamanye ala amabizo esiwaphileyo, besekusibakhona elinye ibizo elikhomba isilisa.

Izibonelo: inkukhu, umuntu, inkomo, inja, imbuzi, imvu, wonke la njengoba sitshilo ngaphambili ayibulili bonke. Nansi isilisa esiqondane lawo: inkukhu – iqhude, inkomo – inkunzi, inja – ichalaha, imbuzi – impongo, imvu – inqama, inkukhu – iqhude.

Nanzi izibonelo zesifazane sesilisa esitshengiswe ngaphezulu: inkukhu – isikhukhukazi, inkomo – inkomokazi, inja – injakazi, imbuzi – imbuzikazi, imvu – imvukazi, njalonjalo. Ngalokhu-ke sesingatsho ukuthi u – kazi yisijobelelo esikhomba ubulilikazi/isifazane.

2. Kodwa amanye amabizo ehlukanisa isilisa lesifazane ngokusebenzisa amabizo ehlukeyo, okutsho ukuthi awasebenzisi isijobelelo u –kazi ukutshengisa isifazane. Izibonelo: Ibizo umuntu liyibulili bonke kodwa amagama akhomba isilisa atshiyene lala akhomba isifazane. Izibonelo amabizo la akhomba isilisa: indoda, umfana, ubaba, umfowethu, ubabamkhulu. Ngokulandelana kwawo isifazane simi kanje: indoda – umfazi, umfana – inkazana, ubaba – umama, umfowethu – udadewethu, ubabamkhulu – ugogo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds