uMthunywa
Imbongi nguBernard D Ndlovu
Isihloko senkondlo — Ukholo lwami
SINANZELELE bafundi ukuthi inkondlo le siqale ukuyicubungula ngeviki ephelileyo kodwa kasiyiqedanga ngoba yelulekile kancane. Sizwile ukuthi imbongi ingulowo ozinikeleyo ekholweni lwakhe. Lalamuhla ingxenye le esiyicubungulayo ingakho lokho ukuzinikela kwembongi kukholo lwayo.
Ke sizwe ngawayo amazwi ukuthi ithini imbongi: “Ngikholw’ukholo lwami, Ngizahlala nginjalo nje, Angiyikutshed’engimi khona, Ungaz’unginxusel’ilima Lokungisus;engimi khona, Ngizakuma ngiqonde nta.”
Izimisele imbongi kukholo lwayo ngoba ithi kayikutsheda izakuma iqonde nta. Siyakubona njalo ukuzinikela kwayo imbongi ngoba nxa sokufika kwezokholo bayatshiyana labakibo. Iyaveza imbongi ukuthi yona labakibo bahlanganiswa yinyama, umoya ngowayo yodwa ngakho ithi kayiyekelwe ikholwe yodwa. Yikuzinikela okukhulu entweni ethile lapho umuntu afisa ukuthi kayekelwe azenzele okwakhe yedwa. Lokhu kuveza sobala ukuthi labakibo abangeze bayiguqula ukholo lwayo imbongi.
Lamuhla siqala lapho imbongi itshela owakwayo ukuthi kayixolele ikholwe lokho ekukholwayo ngoba yikho lapho okulethemba layo khona. Ikubeka sobala njalo imbongi ukuthi lapho ekholwa khona yikho lapho okulenjabulo yezinjabulo zakhe lenkazimulo yempilo yalo yona engelaqhwala lenswelo. Izimisele kukholo lwayo imbongi ngoba itshela lowo ekhuluma layo ukuthi izabambelela kuphela ekholweni lwayo ngoba lukholo elukholwayo yona.
Ngamanye amazwi kusobala ukuthi imbongi izimisele ukulufela ukholo lwayo ngoba izinikelwe ukuqhubeka lalo lanxa sekunzima okunganani. Ileqhono imbongi ngokholo lwayo ngoba itshela lowo ongabe uyayisola ngalokho ukuthi ikholwa olwayo ukholo hatshi olomunye. “Ngikhol’ukholo lwami, Angikholwa kholo lwakho, Anginyathel’egumeni lakho, Pho ungibangisani wakwethu, Okukwenz’ ukhulume kubi ngami, Ngokholo olungasilwakho nje? Mina ngingatsho lutho ngawe.”
Sekumgceke ukuthi isimcunukela lo owakibo omsola ngokholo lwayo. Ungezwa umuntu esekhuluma amagama anjengala angaphezulu uyabesecunukile esedinwa yilokho ongabe ukutsho kuye kumbe ngaye. Iyamtshela imbongi lo owakwabo ukuthi engazihluphi ngokholo olungasilwakhe. Ikubeka sobala imbongi ukuthi yona kayimbangisi ukholo lwakhe lo omunye agagadlele waphelela kulo ngoba kuyilo ukholo lwakhe.
Sesikutshengisile ukuthi imbongi yona izinikele njalo ibambelele kukholo lwayo njalo ifungile ukuthi izahlala injalo kayikutsheda. Kayiyikwesaba lutho imbongi ngokubambelela kukholo lwayo ngoba itshela umfowabo ukuthi lehloka elibukhali kayiyikulesaba lizaphela lenze intando yalo kulokuthi itshiye ukholo lwabo. Yikuzimisela okukhulu lokhu okuvezwa yimbongi kukholo lwayo. Kunzima lapha ngoba imbongi ikholwa ukholo lwayo lodwa. Lokhu kulezilandelamuva ngoba sizwa imbongi isithi bonke abakwabo bayidelile.
Kuvele kunjalo ekholweni ngoba angithi loJesu Krestu laye siyezwa ukuthi bamphika abakibo ngenxa yokholo lwakhe. Abafowabo bembongi kuthiwa sebeyibalekele imbongi bethi ingumhlamuki ngenxa yokholo lwayo yodwa.
Bayacaca laba bembalekela ngoba bethi ukholwa into engaqondakaliyo, elemikhuba etshekileyo, lemibhalo engabalekiyo. Banjalo abantu nxa bengazwisisi ulutho bathi alubaleki.
