uMthunywa
Cornelius Luphahla loNomthandazo Ndlovu
ZIKHALA ezimathonsi izakhamizi zeNtalale eGwanda kanye lezeZezani eBeitbridge ngenxa yamasela aseziqedele ezifuyo ngokuzintshontsha esiyazithengisa eBotswana kuthi ezinye ezithiye ezibulale athengise inyama.
Amasela la uMnumzana Jabulani Siziba, uNkululeko Tshuma kanye labanye babo kubikwa sebelesikhathi eside bentshontsha inkomo kanye lembuzi zabantu besiyazithengisa eBotswana ezinye bazibulale badle inyama.
Kubikwa uSiziba ubotshwe ngamapholisa kuviki ephelileyo eBeitbridge ngemva kokutholakala ehlinza inkomo kaMnumzana Jerald Sibanda qede wabaleka lezankosi kwathi uSibanda labanye bakhe babanjwa sebesiyafika eBotswana bentshontshe inkomo eGwanda.
UMthunywa uxhumane loMnu Sibanda oyisakhamuzi seZezane walandisa ngokuntshontshwa kwezifuyo lokhu ethi sebekhathele ngesenzo lesi.
“Amasela asesiqedele izifuyo zethu ezintshontsha esiyazithengisa. USiziba thina sasimazi engumzingeli kanti usethiya izifuyo zethu azibulale athengise inyama eyinye adle. Isimanga yikuthi uyisakhamuzi sakhonapha esigabeni okokuthi bekungafanelanga ukuthi enze isiga lesi.
“Okungizwisa kakhulu ubuhlungu yikuthi uSiziba uthe esebotshiwe wabalekela amapholisa elezankosi ngakho izifuyo zethu lokhe zisengozini ngoba engazintshontsha futhi,” kutsho uMnu Sibanda.
Ekhuluma lentatheli uMnumzana Brighton Ndlovu oyisakhamuzi seNtalale uthe laye ubentshontshelwe inkomo zakhe lezezinye izakhamizi zayabanjwa endleleni.
“Mina lami bengintshontshelwe inkomo zami ezinhlanu kwathi ezinye izakhamizi lazo zantshontshelwa. Ngalokhu sibe lenhlanhla ngoba sahle sabikela amapholisa sasesiwalandela amasela la sawathola endleleni engakafiki eBotswana okuyikho abathi bajwayele ukuzithengisela khona nxa bezintshontshile.
“Ngemva kwalokho sabasa emapholiseni kodwa noma kunjalo mina ngizwa ubuhlungu ngoba sezizinengi inkomo zami ezacatshayo okutshengisa ukuthi yibo ababezithatha,” kutsho uMnu Ndlovu.
Isikhulumi samapholisa esabelweni seMatabeleland South uInspector Philisani Ndebele ebuzwa ngale indaba uthe kakayizwa.
“Indaba yamasela antshontsha inkomo kulesisabelo kasikayizwa ngakho sizayidingisisa,” kuphetha uInsp Ndebele.
