uMthunywa
Cornelius Luphahla
ZIBUKELE ibhayisikopo yamahala izakhamizi zelokitshini leLuveve koBulawayo ngemva kokuba elinye inina lakulelilokitshi livoxe uyisezala kwaba luthuli lithi uyalidelela, uMthunywa ukuzwile lokhu.
Isisanasana lesi senzakale kuviki ephelileyo lapho uNkosazana Lydia Moyo odinde khona uMnumzana Eric Voko kabuhlungu ethi uyamdelela ngoba wale ukudla isitshwala wathi isitshebo kasilasobho.
UMthunywa ukhulumisane loNkosazana Ethel Ndlovu ongumakhelwane kaVoko wathi nguye owalamula impi le waselandisa ngokwenzakalayo.
“Mina ngangizihlalele endlini yami ntambama ngezwa umsindo komakhelwane ngagijima ngaya khona. Ekufikeni kwami ngathola uNkszn Moyo etshaya uyisezala kabuhlungu eseze wamwisela phansi ngasengilamula.
“Ngemva kwalokho ngambuza ukuthi umtshayelani wathi uyamdelela umthethisile wathi kakwazi ukupheka ngoba upheke isitshebo esingelasobho, ngasengimkhuza,” kulandisa uNkszn Ndlovu.
Ebuzwa ngale indaba uNkszn Moyo uvumile ukuthi yenzakala wathi kodwa uyisezala nguye owaqalisa ukumtshaya laye wasembisela njalo uzathutha lapha.
“Mina ubabazala lomamazala bayangizonda njalo bahlala bengithethisa nxa umkami engekho. Ngalokhu ngapheka isitshebo lesitshwala nganika ubabazala wasengithethisa ethi kangikwazi ukupheka ngoba kangifakanga isobho.
“Ngemva kwalokho wangitshaya ngenduku lami ngambisela ngoba ngasengizondile. Ngokunjalo ngizasuka endlini yakhe ngiyehlala kweyinye indawo ngoba kukhanya ngiyabahlupha lapha,” kutsho uNkszn Moyo.
Ekhuluma lentatheli uMnu Voko uthe kakwazi ukuthi umalukazana wakhe ubemtshayelani wala ukuthi ubemthethisile wamtshaya.
“Mina kangikwazi ukuthi umalukazana wami ubengitshayelani ngoba bengingenzanga lutho kodwa ngimtshele ukuthi ngithanda isitshebo esilesobho yena wasengitshaya. Noma kunjalo akulandaba kangisoze ngimbophise kodwa uzabona,” kuphetha uMnu Voko.
