uMthunywa
Silo Cornelius Luphahla
MTHWAKAZI kaNdaba ngangike ngizibe ezinye izindaba ngithi mhlawumbe luhubhu lukabhejane kanti hlaluka muntu wenkosi yindaba mqoka. Ukuyiziba lokhu phela kuyabe kudalwa yikuthi impukane le iyabe izwakalela komakhelwane kodwa ingamana ithi fuqaqa egumeni yikho amehlo avuleka khona.
Phela qaphela ukuthi oMandulo babengasomi nxa babethi impi ivinjwa ingakaze yafika ebaleni lomuzi. Ngakhona ke lasempilweni isitha sinqatshelwa sisasekude ngoba singangena egumeni umdeni wonke uba yikudla kwaso nxa ungazange wabelethwa zinyawo.
Lapha bakwethu ngicacada indaba yempilo nje ukuthi ingozi kayihlaleli ngakho kwakube kuhle ukuthi sihlale siqaphele ukuze singaweli emgodini ongelamkhawulo. Kunjalo phela abantu abanengi baphelelwa zimpilo zabo bengananzelele ngenxa yokuthatha kancane ezinye izinto .
Ingozi le engiyibalisayo ingenzakala ngendlela ezinengi ezitshiyeneyo bakwethu. Okunye kungaba yikungahlolisisa abantu esiphila labo empilweni ngoba phela abadala bathi umngane wakho yisitha sakho. Angithi nje kuvamile ukuthi umuntu abe lomngane ongalunganga kodwa engakunanzeleli lokhu.
Ukungalungi lokhu kungaba ngendlela ezinengi ezehlukeneyo njengoba nje ubugebengu sobuvamile kangaka kuleli.
Kukhona abanye abantu abalungileyo emini kanti ebusuku babhukuda indoda bayisusele amanqe. Khumbula ukuthi bangaki abantu abafa bebulawa ngabangane babo ngokubadingela ezinye izigelekeqe ukuthi zibahlasele.
Khumbula ukuthi abanye abalwanguza sasilwangulwangu lesi engikhuluma ngaso ngamantombazana asebenza ezindlini. Njengoba zonelwa mvunye kodwa nje abanye babo balungile. Angithi amantombazana la afika elungile kodwa engajwayela umuntu wakhona umana athathele umninimuzi umkakhe adele umsebenzi.
Kukhona njalo abanye abangane abangabaduhisi empilweni okokuthi ungavela uzwane laye uzalwisa ngendlela zakhe zonke ukuthi akuduhise sibili ufane laye. Ekuqaliseni nxa lihlangana umuntu onjalo uyazenza imvu yenkosi kodwa kusiya ngokuhamba kwesikhathi aphenduke abuveze ubuqaqa bakhe.
Nanzelela ukuthi izigebengu kanye labonondindwa abanengi kabenzanga lokhu ngokuthanda kwabo kodwa abanye babo bathathekiswa. Ngokunjalo abanye balaba baphetha befela amafufu okwegundwane njengoba nje impilo zabo ziyabe sezoniwe zimpukane lezi ezikulo umhlaba.
Kwesinye isikhathi isilwangulwangu lesi siyafika egumeni sizocela usizo kuthi ngenxa yozwelo lomninimuzi asamukele engazi ukuthi ufunza inyoka ilambazi. Ngokuhamba kwethuba umuntu onjalo usuka eseyenze esinye isiga esesabekayo.
Angithi nje eLupane kulendoda eyagcina eyinye iyelapha ngapho iyipha kanye lokudla kodwa wavuka ubunke umnanabantu ngesikhathi esebona ukuthi umninimuzi kakho wabhukuda wacuya umkakhe qede wanya amahlabathi.
Ngikhuluma nje indoda le lakathesi isalilela umkayo owabulawa yisihambi lesi.
Ngalokhu Mthwakazi omuhle ondlela zimhlophe kwakube kuhle ukuthi siqaphele abantu esiphila labo ukuze singaze sangena ezingozini ezifana lalezi. Kunjalo bakwethu, ngiyitshayile eyami ingquzu osokusele yikuthi kungene omunye emdangweni.
