Sebegcoba amakhondomu abafundi

Sebegcoba amakhondomu abafundi

0 637

PHEZU kokuba ijazi lomkhwenyana laziwa ngokuvikela izifo ezithathelanayo ngocansi ngokuvikela ukukhulelwa, kodwa kulabafundi asebelisebenzisela okwehlukile.

IWeekend Argus, enguzakwabo weSolezwe ngeSonto, ihabule ukuthi kulabafundi abasebenzisa ijazi lomkhwenyana ukucwebezelisa izicathulo lenwele. Lokhu kuthiwa sekutshiye othitsha bedidekile, ngoba babona sengathi izibalo zokukhulelwa kwabafundi  azisoze zinqandeke.

U-Evonne Janjties, ongumbalisi ofundisa iLife Orientation ku-grade 11 lo-12 eMount View, eHanover Park, eKapa, uthe abafundi bavele badlale ngamajazi omkhwenyana uma eselethiwe.

Uthe sebeke bezwa lokuthi abafundi besifazane bagxoba amaphilisi okuvikela inzalo bawahlanganise lamafutha ekhanda. Bathi kwenza inwele zibe zinhle zicwebezele.

Kulesi sikolo esilabafundi abagila lo mhlola, kulabafundi abangu-743. Kulabo bafundi kuthiwa bahlanu abazithweleyo.

Ngesonto eledluleyo, uMnyango wezeMfundo, ugunyaze ukufakwa kwamajazi okuvikela abesifazane lawesilisa ukuba afakwe ezikolo.

Yize kunjalo okhulumela uMnyango wezeMfundo eWestern Cape, uPaddy Attwell, uthe kulesi sabelo kuzakwenziwa isinqumo sokuthi ayalethwa kuleso sikole noma cha.

UMnyango wezeMfundo eGauteng usudalule ukuthi abazali babafundi besikolo iPretoria West High, bavotele ukuba ungaphasiswa umthetho obuzavumela abafundi ukuba bagqoke amabhulugwe “angonswi”.

Okhulumela lo mnyango uMnumzama Steve Mabona, uthe emhlanganweni wabazali obungoLwesine okuyilapho bevote khona bawuchithile.

Uthe abafundi bayakhuthazwa ukuba basebenzise imigudu efanele uma kukhona abakhala ngakho. Lokhu kungavikela iziteleka lokuphazamiseka kokufunda okungelasidingo ezikolo.

Uthe phezu kokuba kubalulekile ukuthi imfundo lokufundisa kumele kuqhubeke ngaphandle kokuphazamiseka bakhuthaza ukuthi kungabi khona okuzaphazamisa isikolo ngoba lokho kungaba lempumela embi.

Ngesonto eledluleyo, kube lokuphazamiseka kokufunda kulesi sikolo ngenxa yabafundi abatelekele ukuvunyelwa ukuba bagqoke amabhulugwe abambayo.

UNgqongoshe wezeMfundo eGauteng uMnumzana Panyaza Lesufi, uthe ugculisekile ngesinqumo esithathwe ngabazali, wakhuthaza labanye abazali ukuba benze okufanayo. — Isolezwe

NO COMMENTS

Leave a Reply