Uncategorized

Sesisondele isikhumbuzo seNkosi uMzilikazi

07 Sep, 2017 - 02:09 0 Views
Sesisondele isikhumbuzo seNkosi uMzilikazi

uMthunywa

Cornelius Luphahla
KUZATHUNQA uthuli lothudlana emkhosini wesikhumbuzo senkosi uMzilikazi ozakuba khona ngempelaviki eMhlahlandlela budebuduze leMatojeni lapho okwakuyisigodlo senkosi khona.

Umkhosi lo uhlelwe yinhlanganiso yezamasiko iMthwakazi KaMzilikazi Cultural Association ngakho uzakuba khona mhlaka 9 Mpandula.

Inhlanganiso le yazisa uzulu ukuthi kuzabe kulezimota ezithwala abantu eCity Hall koBulawayo ngo8.00 ekuseni zibasa emkhosini lo zibuye ziphenduke labo.

UMthunywa ukhulumisane lelinye ilunga lale inhlanganiso uNkosazana Felicity Dube wathi inhlanganiso le sileminyaka ethile bayisungula njalo umkhosi lo ujonge ukuvuselela ezamasiko kuleli.

“Inhlanganiso yethu le sileminyaka engu-16 sayisungula njalo injongo yethu yikuvuselela ezamasiko kanye lokuwathuthukisa. Ngalokhu umkhosi lo siwenza minyaka yonke evikini yakuqala enyangeni kaMpandula njengoba inkosi yethu yakhothama ngayonale inyanga ngo1868.

“Emkhosini lo kuyabe kugidwa imihlobo yonke yemigido ngenhloso yokukhumbula impilo kanye lenhlalo yaboMandulo. Kuzakuba khona njalo amaqembu omculo kamaskandi azajabulisa uzulu, amanye amaqembu ezamasiko kanye lezethekeli ezivela kweleSouth Africa okudabuka khona inkosi uMzilikazi kanye lezeBotswana lapho inkosi eyadlula khona ngesikhathi ivela kwaZulu,” kutsho uNkszn Dube.

UExecutive Co-ordinator wale inhlanganiso uMnumzana Rodgers Vuthuza Mthethwa ubikele uMthunywa ukuthi umkhosi lo ujonge ukukhumbula inkosi uMzilikazi njengeminyaka yonke njalo akukho okuzenziwa okutshiyene lokweminyakeni.

“Enye injongo yomgubho lo yikukhumbula inkosi eyadabula isizwe uMzilikazi kaMatshobana njengeminyaka yonke.

Ngalokhu ngikhuthaza uzulu ukuthi aphatheke emkhosini lo ukuze azokhumbula inkosi yakhe. Ngalokhu akukho okunye okuzenziwa ngalolusuku ngaphandle kwalokho.

“Ngalokhu sizakupha abantu abatshiyeneyo amathuba okuthi bakhulume. Okunye njalo sizanika laMaKhumalo ithuba ukuthi bazise uzulu ukuba sebehambe kangakanani ngomsebenzi wokubekwa kwethole lesizwe,” kutsho  uMnu Mthethwa.

Omunye wabaculi bakamaskandi abazabe bekhona emkhosini lo obizwa ngokuthi liBhantinti Elitsha uthembise uzulu ukuthi uzamtshayela idlalade lakhe elitsha emkhosini.

“Mina ngithembisa uzulu ezimnandi ngoba ngizamdlalela idlalade lami elitsha elithi iSMS Ye X yami kanye lamanye njalo amadlalade ami,” kuphetha iBhantinti elitsha.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds