uMthunywa
Ulomngane engingamzwisisiyo
UMKAMI ulomngane wesifazane esontweni oseqala ukungikhathaza. Ngemva kokutshada laye mina ngehlukana labangane bami bonke besilisa engangijwayelene labo. Ngangizitshela ukuthi laye uzakwenza okufanayo kodwa cha.
Usisi lo uyafonela umkami ngitsho lebusuku emazisa ngakho konke okwenzakala empilweni yakhe. Okungiphatha kubi kakhulu yikuthi umkami uyakwazi mhlophe lobu bungane babo abungiphathi kuhle. Ngiyamthemba umkami, usisi lo nguye engingamdingiyo empilweni yethu.
Impendulo:
Ubungane phakathi kobulili obuhlukeneyo abusibo hlupho. Inkinga yikungena kobungane babo phakathi kwenu. Nxa lobu bungane bungakuthokozisi wena njengonkosikazi kubalulekile ukuthi umkakho akuhloniphe lokho. Kumele bame ukufonelana ebusuku nxa wena njengonkosikazi wakhe kukukhathaza lokho. Yena kumele asihloniphe isicelo sakho.
Ngilovalo lokulahlekelwa yisithandwa sami
Ngithandana lowesilisa engimthanda kakhulu kodwa angazi loba yena uyangithanda na. Eqinisweni ngicabanga ukuthi uyangibekezelela kulokungithanda. Ngiyafisa ukufana lezinye izithandani lami ezibambana izandla, ngitsho zihamba ziqabulane nje kungonakele lutho. Ngenza konke okusemandleni ami ukumbonisa ukuthi ngiyamthanda.
Wacina ukuthi uyangithanda sisanda kuhlangana. Iyangidida ngempela linto. Yiziphi izimpawu ezitshengisa ukuthi umuntu uyakuthanda? Ngilovalo lokulahlekelwa yisithandwa sami.
Impendulo:
Abantu uthando balubona ngendlela ezehlukeneyo. Okuhle yikuthi wena uyazi ukuthi ufuna ukuthandwa njani.
Okubalulekileyo yikuthi usazise isithandwa sakho ukuthi ufuna ukuthandwa njani. Kungenzeka ukuthi wena ungumuntu othanda ukuthintwa lokutshelwa amazwi akhuthazayo ekubeni abanye bona bathanda ukwenzelwa izinto lokuthengelwa izipho. Ngilethemba lokuthi mzukulu uzawubona umehluko ngemva kokuxoxisana lesithandwa sakho ngendaba le.
Umkami usengincitsha inkonzo yasekamelweni
Sesileminyaka emithathu sitshadile lomkami. Ngiyazifela ngaye. Umkhuba engingawuthandiyo kusukela ezinyangeni eziyisitshiyagalolunye ezedlule, useqala ukungincitsha inkonzo yasekamelweni. Usehlezi elezizatho ezehlukeneyo ezichaza ukuthi kungani singancindi uluju lwemvelo.
Mina ngithembekile kuye. Ngemva komtshado sasisiya emacansini kathathu noma kane ngeviki. Kodwa manje kuyazithulela nje. Nxa kwenzekile siya kanye emavikini amabili, ngesinye isikhathi inyanga iyaphela.
Impendulo:
Kuyajabulisa ukwazi ukuthi uyamthanda umkakho. Ukungayijabuleli inkonzo yasekamelweni ngemva kwesikhathi lishadile akusiyonto eyethusayo. Noma kunjalo, ayisiyonto njalo okumele uyijayele emtshadweni wakho mzukulu.
Kunengi okudala ukuthi umuntu wesifazane angafuni ukuya emacansini lokhu kungabangelwa yikungakhululeki emoyeni loba empilweni nje. Ukukhuluma kwenu kufanele kuhlanganise lendlela angajabulela ngayo ukuya emacansini. Xoxisanani, ungamlwisi, likhulume nje, okunye okungasiza yikuya kubodokotela ayehlolwa isifo esibizwa ngokuthi yi-hypoactive sexual desire disorder.
