uMthunywa
Silo C Dube kugwalo
UMNUMZANA J P Ndebele, umlobi walolugwalo ukhethe ukuthi abalingiswa bazikhulumele udaba lwabo. Thina esilufundayo siluzwisisa ngcono ugwalo, kanti lezimilo zabalingiswa zihle zivele sobala ngalokho abakukhulumayo.
USwabide Khumalo, utitshanhloko weTotololo usekele mgceke ngohambo lwakhe esiyadinga umuthi wokubulala isilinyana sikaMaNdlovu umkakhe.
Nxa ekhuluma ngoNkosi lowo mntwana owazalwa ekhubazekile kasuwakhe kodwa usengokaMaNdlovu, umkakhe yedwa. Lanxa wayethe kuzalukazi leziya ezabelethisa uMaNdlovu ukuthi umntwana uzaphila wasala
engakhululekanga ngaphakathi yikho ethatha ithuba kuphela umhlangano wabo mphathisikolo eGweru yena uhle agijime ayedlula enyangeni. Lokhu ukwenza ngoba ufuna ukucitsha umphefumulo kaNkosi.
Ukuba lomntwana okhubazekileyo emzini wakhe uKhumalo ukubona kulihlazo, into engamxotshisa lomsbenzi.
Khumbulani bafundi ukuthi sikubethile ngaphambili lokhu. Wenza izimanga uKhumalo esefike lomuthi kaMahaqaza. Kwavuswa umuzi wonke kwathiwa kuphunyelwe ngaphandle. Bageziswa ngemithi okwathi lanxa uMaNdlovu ebuzwa wahwajelwa kwathiwa kenze lokho ayekutsheliwe kuphela engabuzi ukuthi kwenzelwani lokho.
Wayengasajwayeleki uKhumalo ngoba lanxa uMaNdlovu engathi uyasola uthi wamvulela amehlo, edlalisa inkombabantu phambi kwakhe. Wagoqa izandla wavala owakhe uMaNdlovu. UNkosi ngobuncane bakhe, uKhumalo uthi yamngena intuthu. Waphaphama ebuthongweni ekhwehlela kakubi waze watshokoza udenda. Ebona lokho uKhumalo uthi enhliziyweni wazitshaya isifuba ebabona bevuma abaphansi.
Nanti ikholwa elinguKhumalo selihlamukile kubuKrestu selikholwa abaphansi. Wenza zonke lezi ziga nje Khumalondini uthi imithi yakhe isebenza kuhle ukuze ichithe umphefumulo kamntakaMaNdlovu uNkosi.
Uzaphumelela na uKhumalo kumsebenzi omubi kangaka? Umuntu kumbe umlingiswa onje akumelanga aphumelele emsebenzini emibi kanje ngoba kungaba yimfundiso embi kakhulu.
Kusenzeka konke lokhu uyasitshela yena Khumalo ukuthi umkakhe uMaNdlovu wagcwalelana ebona umntwana esenje, kodwa wesaba ukuyiphumisa egcekeni insolo yakhe ngoba ebunzini lapha uthi wayesevuke eseganga. Indebe lezi bathi zasezilokhu zivuleka zivaleka kodwa kungaphumi lizwi. Uthi wayephethe uKhumalo ekhuluma labaphansi ebatshela ukuthi abayithathe inyamazana yabo yena wayengayifuni.
Kambe kwake kwathiwa umuntu yinyamazana? Lamazwi atshengisa sobala ukuthi uKhumalo wayemzonda kakhulu uNkosi, emfisela lokufa. Esesuthisekile ukuba usewufeze ngendlela yawo umsebenzi wakhe wathi sekungalalwa.
Bathi abanye bengena ezingutsheni belala, yena waphuma phandle lodengezi lwakhe wathunqisela ebhoda umuzi.
Uthi wanqunula uKhumalo ebethela umuzi wakhe. Wenza konke lokhu uMaNdlovu kakajumeki ngoba uthi wamthola elokhu engakajumeki.
UKhumalo uthi wezwa uMaNdlovu ecela ukuthi umoya oyiNgcwele wehliselwe phakathi kwaleloguma kube khona ukuthula lokwethemba uNkulunkulu ukuze axekelane lomuzi wabo uLusifa. UKhumalo uthi yena wancifa kakhulu emsola ngoba engahle aphambanise izihlahla zakhe ngemithandazo yakhe le yansuku zonke engasizi ngalutho.
Yayingasizi ngalutho kambe imithandazo kaMaNdlovu? Lanxa wayekholwa kusiKrestu ngaphambilini kukhanya uKhumalo usehamba ngonyawo olunye olukholwa kuzinyanga lamadlozi.
Yiphi indlela ezanqoba phakathi kwesiKrestu leyamadlozi?
