Uncategorized

Uklinya abulale umakhelwane kubangwa iqhude

31 Aug, 2017 - 02:08 0 Views
Uklinya abulale umakhelwane kubangwa iqhude

uMthunywa

Nomthandazo Ndlovu
ZIBHEMISANA igwayi izakhamizi zesigabeni seMapate eGwanda ngendaba yesalukazi esiklinye ixhegu elingumakhelwane waso lafa kubangwa iqhude.

Limbedumehlwana etshiye uzulu emangele yenzakale ngeviki ephelileyo.

Isalukazi lesi, uJesca Ncube (50) lomuyi  uMnumzana Mbuso Kukubele (85) babhuqane uthuli lwavala ilanga kubangwa iqhude likaMnu Kukubele ebelilandela inkukhu zikaNcube.

Kubikwa uNcube wabikela uKukubele ukuthi azame icebo ngeqhude lakhe elihlala lisezithende zezikhukhukazi zakhe ngoba kafuni lakulibona emzini wakhe.

Ekhuluma loMthunywa uNkosazana Mildred Mleya oyisakhamuzi esigabeni lesi uthe okwenze laba ababili balwa yikuthi kube lokungazwani phakathi kwabo ngenxa yeqhude likaKukubele ebelilokhu lihlezi inkukhu zikaNcube loba umnikazi ubeseke wamkhuza ngalo.

“UMaNcube wake wakhuza uKukubele ukuthi ananzelele iqhude lakhe lingalandeli inkukhu zakhe kodwa uKukubele kazange abe lendaba lakho,” kutsho uNkszn Mleya.

“UMaNcube kukhanya kumcaphulile ukuthi uKukubele azithulele ngendaba yeqhude lakhe eselithwalise qatha izikhukhukazi zakhe waselanda uKukubele emzini wakhe waqala ukumtshaya ngomqwayi uKukubele wakhulelwa nguMaNcube ngoba ubelimele isandla senxele njalo ubekhanyiwe okuyikho okubangele ukuthi abhubhe,” kuchaza uNkszn Mleya.

UMnumzana Obert Ndlovu ongumntaka-muyi, uMnu Kukubele uthe liqiniso ukuthi uyise walwa lo Nkszn Ncube kubangwa iqhude.

“Kuliqiniso ukuthi uNkszn Ncube lobaba balwile sibili, kodwa abantu lani liyabazi ngokungezelela isawudo endabeni zabantu,” kutsho uMnu Ndlovu.

“Ngizwa ubuhlungu ngento eyehlele ubaba, loba umama lo ebotshiwe akusasizi ngoba ubaba sesitshiyile ngeke aphenduke,” kuchaza uMnu Ndlovu.

Ekhuluma loMthunywa udadewabo kaNkszn Ncube othande ukwaziwa ngokuthi nguNaPhi nje kuphela uthe yena kakukholwa ukuthi abantu sebengalwa bebanga iqhude, ikhona indaba evalwayo.

“Abantu bathi udadewethu ulwe loKukubele kubangwa iqhude kodwa mina ngicabanga ukuthi ikhona indaba la ngoba kuthiwa bake balwa futhi bebanga inkulumo zokuthi uKukubele ulolwazi ngodaba lomngane wakhe okhombise umfazi womuntu,” kuchaza uNaPhi.

Isikhulumi samapholisa esabelweni seMatabeleland South uInspector Philisani Ndebele uthe kuliqiniso ukuthi kulodaba olunjalo olwenzakeleyo.

“Samukele umbiko wenina elikhame ixhegu kubangwa iqhude, sicebisa abantu ukuthi baxazulule okubahluphayo ngokuthula hatshi udlame, ukulwa akuncedi nanko omunye usefile efela into encane njengenkukhu,” kuphetha uMnu Ndebele.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds