uMthunywa
UMUNTU wonke nxa esuka esikolo uyabe elakho afuna ukukwenza empilweni ukuze athole ukuziphilisa, njalo siyake sizwe abantwana abancinyane labo bekhuluma ngalokhu abafisa ukukwenza nxa sebekhulile.
Abantu balakho ukuzikhethela ukuthi bafuna ukwenza umsebenzi onjani njalo akekho umuntu oncindezela omunye ukuthi enze umsebenzi angawufuniyo. Kungakho-ke kuqakathekile ukuthi umuntu adingisise ukuthi sipho bani alaso azasisebenzisa nxa esesebenza ukuze azidingele umsebenzi azawuthanda njalo awenze ngobuciko.
Nxa kuyikuthi umuntu ufisa ukwenza umsebenzi othize kuzafanele azimisele kiwo awenze ngothando langenhliziyo yakhe yonke njalo kuzafanele ubengumsebenzi ongamvilaphisiyo.
Kule iviki iphepha leChronicle ngoLwesithathu belimumethe udaba olubuhlungu, loludaba ngolwenina eladlwengulwa yisigebenga qede samsika isitho sangasese. Inina leli laqeda amahola ambalwa lisebuhlungwini.
Angithi laso lesisigebenga sakhetha ukwenza ubugelekeqe lobu kodwa-ke kayisiwo ngitsho umsebenzi umuntu angaziqhenya ngawo emhlabeni.
Abenza lokhu kumele badilikelwe ngamajele ngoba kusegcekeni ukuthi uzwelo kanye lesisa kukhatshana labo.
Abanye babaze bathi kabalanhliziyo ngoba isenzo lesi kasitshengisi ukuthi lowomuntu ulenhliziyo yokuzwela.
Kambe ukudlwengulwa kodwa nje angithi kuyinto ebuhlungu kulo ohlukuluziweyo pho nxa lowomuntu sezaphinda asike isitho sangasese kuba buhlungu okunganani.
Le kayisiyo yodwa indaba edabula inhliziyo, kukanengi njalo sifunda izindaba emaphephandabeni kukanti kwezinye izikhathi sizibonela ngawethu amehlo abantu bekhala ngobuhlungu besezibhedlela kodwa omongikazi bengakutshayi indiva lokhu bethi labo abasebuhlungwini bayazenzisa.
Lezizindaba zidabula inhliziyo ziphinde zitshengisele ukuthi abantu abanengi benza imisebenzi hatshi ngoba beyithanda kumbe befuna ukuphathisa uzulu kodwa bakwenza nje ngenxa yokuthi bafuna imali yokuziphilisa.
Kodwa esisuka sizibuze khona yikuthi kungani abantu bekhetha ukwenza “imisebenzi” eyangisayo empilweni enjengokuhlukuluza abanye abantu.
Ukwanda kwendaba zokudlwengulwa kwabantu kuleli kudinga ukuthi kuqiniswe umthetho welizwe ukuze abantu bekele ukwenza lokhu. Kungumbono waleliphephandaba ukuthi aluba labo abadlwengula abanye kungabe kungumntwana kumbe umuntu omdala baphiwa isigwebo sikadilikajele.
Okwenza lababantu baqhubeke bedala amacala la yikuthi bazimisele ukuyahlala impilo yabo yonke ejele njengokuzimisela ababalakho nxa bedala amacala la kungakho izigwebo ezinde yizo kanye ezibafaneleyo.
Kungakho-ke kuqakathekile ukuthi abantu bakhethe ukwenza imisebenzi emihle emphakathini hatshi ukuhlukuluza abanye.
Akudingakali ukuthi ngumsebenzi bani, ungabe ungumbalisi, umaneja, umtshayeli kumbe umanjinela, isiqokoqela yikuthi usebenza labantu njalo usebenzela abantu kungakho-ke, baphathe kuhle.
