uMthunywa
Gladmore Ncube
KUDIDIZELE wonke umuntu okade esenkonzweni yomtshado eMethodist Church elokitshini leMpopoma koBulawayo ngoMgqibelo odluleyo ngesikhathi umakoti evuka idimoni wacela ezinyaweni, sekulindwe ukuthi umyeni wakhe amgqokise indandatho, uMthunywa uyakuveza lokhu lamhlanje.
Kubikwa ukuthi uMnumzana Martin Chauke usele ebambe owangaphansi ukuthi umkakhe uNkosazana Gracious Moyo ungenwe yini aze ambalekele emtshadweni ngesikhathi sokuthi amfake indandatho.
Bobabili akusatholakalanga iminyaka yokuzalwa kwabo, loba nje abafakazi abaqotho kuloludaba besithi ngabantu abadala.
UMthunywa uke wakhulumisana lomunye wabazalwane obekhona emtshadweni lo obike ukuba kuliqiniso ukuthi kulomakoti ocele ezinyaweni emtshadweni wakhe.
Umfakazi oqotho owayekhona emtshadweni uNkosazana Nicole Dube uthe umakoti wenze ihlazo eliyangise umkakhe kanye lemuli zabo.
“Okwenzakala kule indawo kwaba yisimanga ngoba umtshado wawuqhubeka kuhle abantu bonke bejabula kwathi sekufika isikhathi sokuthi uChauke agqokise owangakwakhe indandatho wavuka idimoni waqala ukukhuluma izindimi ezazingazwiwa ngumuntu qede waphuma ngesiqubu esontweni elokhu ekhuluma,” kuchaza uNkszn Dube.
Omunye umzalwane laye ozibonele mathupha uthe bekusobala ukuthi umakoti lo ubanjwe lidimoni.
“Lokhuyana lidimoni. Sowake wabona ngaphi umakoti osuka akhulume into ezingaziwa ngumuntu, qede lapho acele ezinyaweni phambili kwebandla. NguSathane lo,” kutsho lumzalwane owale ukuqanjwa ngebizo.
Intatheli yephephandaba likazulu ikhulumisane njalo lesinye isakhamuzi seMpopoma uMnumzana Jeffrey Ndiweni othengisa buqamama lesonto le othe yena wethuka ebona umakoti ephuma egijima egqoke isigqoko somtshado.
“Ngethuka ngibona umakoti ephuma yedwa ebandleni egijima, ekuqaleni ngazitshela ukuthi kumbe uyadlala kodwa okwangimangalisayo yikuthi ngamuzwa ebaleka ekhuluma njalo ehlabela ingoma zolimi engingalwaziyo.
“Kwathi ngokuya kwesikhathi ngezwa abantu bephuma phakathi besithi ubanjwe lidimoni umakoti wala ukutshadiswa,” kuchaza uMnu Ndiweni.
UMthunywa uzamile njalo ukuthi akhulumisane loMfundisi Paul Gava onguye okhokhela ibandla leli njalo onguye owayebahlanganisa ngomtshado ongcwele kodwa kwehlula ngoba ubengekho esontweni njalo abasebenza kule indawo balile ukunika uMthunywa inombolo zakhe zikamakhalekhukhwini kukanti inombolo zocingo bezisala ukungena.
Izisebenzi zebandla leli zibuzwa ngaloludaba zithe uMthunywa kakhulume loMfundisi.
“Thina ngeke sikhulume lentatheli, umfundisi nguye okumele akhulume ngaloludaba,” kutsho esinye isisebenzi esingathandanga ukuqanjwa ngebizo.
Ngokudingisisa kukaMthunywa kubikwa ukuthi uMnu Chauke loNkszn Moyo sebelesikhathi eside bethandana njalo behlala bonke, bekusele ukuthi bahlanganiswe enkonzweni kuphela.
