uMthunywa
Cornelius Luphahla
ZISADIDEKILE izakhamizi zesigabeni seMalibobo eBinga ngemva kokuba enye inyanga ivuke idlozi embuyisweni wesinye isakhamuzi qede yacela inyama yomuntu, uMthunywa uyakuveza lokhu lamhlanje.
Insumansumane le yenzakale ngoMgqibelo kuviki ephelileyo lapho uMnumzana Jethro Mwinde odume ngokuthi nguSiamatende avuke khona idlozi embuyisweni kaMnumzana Bernard Mangembo wathi ufuna inyama yomuntu okuyikho okudale ukuthi kucatshangelwe ukuba ungumthakathi.
Kuzwakale ukuthi inyanga le bathe beyibuza ukuthi iyazela ngaphi inyama yomuntu yathi seyadla abantu abanengi kakhulu esigabeni.
UMthunywa uxhumane loNkosazana Lisca Nkomo oyisakhamuzi kule indawo uthe kalankani ngakubonileyo.
“Mina kangilankani ngengakubona kusenziwa nguMwinde embuyisweni njalo lokhe ngathwetshulwa yingwe kangikaze ngilibone idlozi elenza njengelakhe. Ngitsho ngoba kwathi ngemva kokukhala kwengungu uSiamatende wavuka idlozi wathi ufuna inyama yomuntu.
“Lokhu kwasimangalisa kakhulu ngoba bathi bembuza ukuthi uyazela ngaphi wathi sowadla abantu abanengi esigabeni. Ngalesosikhathi balitshela idlozi lakhe ukuthi akusikho ngakibo kaliyebikela abakibo balidingele leyo nyama okuyikho okwenza lathula,” kutsho uNkszn Nkomo.
Ekhuluma lentatheli uMnumzana Limukani Ndlovu omunye wababekhona mhla kusenzakala isiga lesi uthe idlozi lenyanga le ngelobuthakathi yikho lalifuna inyama yomuntu.
“Mina ngokubona kwami idlozi elavuka kuMwinde ngelobuthakathi yikho lathi lifuna inyama yomuntu. Ngitsho ngoba akhona amadlozi aphila ngokudla inyama zabantu njalo amadlozi la kawaqanjwa. Ngalokhu kusobala ukuthi uMwinde ulalo elinye lamadlozi la ngoba kalikho idlozi eliqotho elingathi lifuna inyama yomuntu.
“Ngokunjalo abantu kufanele bananzelele bengasayidinga usizo kuMwinde njengoba sezivezile ukuthi uledlozi elibi,” kutsho uMnu Ndlovu.
Ebuzwa ngale indaba uMnu Mwinde walile ukuthi indaba le yenzakala wathi yena ngeke akhulume ngamadlozi ngoba engamhlanekela.
“Indaba enjalo kangiyazi njalo ngeke ngikhulume ngabadala mina ngoba bengangihlanekela sibili,” kutsho uMnu Mwinde.
Usobhuku wakule indawo uMnuzmana Future Donga ebuzwa ngale indaba uvumile ukuthi uyayazi kodwa ngeke akhulume okunengi ngoba wayengekho ngesikhathi isenzakala.
“Indaba yokuthi uSiamatende wavuka idlozi embuyisweni wathi ufuna inyama yomuntu ngiyayazi sibili kodwa ngeke ngiyibalise ngoba yathi isenzakala mina ngangingekho eduzane njengoba kwakungekho emzini wami,” kuphetha uMnu Donga.
