uMthunywa
Cornelius Luphahla
ZISELE zikhuza umhlola izakhamizi zelokitshini leMzilikazi koBulawayo kulandela ukuba enye indoda ilume umngane wayo isitho sangasese kubangwa imali yamakhasi.
UAlfred Moyo unkankile uMnumzana Lyton Sibanda ngamazinyo isitho ngeviki ephelileyo kubangwa ukuthi kungani emudle imali yonke emakhasini.
UMthunywa ukhulumisane loMnumzana Limukani Ndimande obekhona kusenzakala indaba le walandisa ngempi le ethi uSibanda bamthwalele esibhedlela.
“Mina ngathola uSibanda, uMoyo labanye abangane babo betshova amakhasi ngasengibabukela. UMoyo uthe esedliwe nguSibanda imali yonke ayelayo, wacela ukuthi amuphe eyokuthenga i-scud sotshwala esisodwa kodwa uSibanda wala.
“Ngemva kwalokho uMoyo wazama ukuyithatha ngenkani okuyikho abaqalisa khona ukulwa uMoyo wathi ebona ukuthi usesehlulwa waluma uSibanda isitho waqaleka. Ngalesosikhathi sahle samthwalela esibhedlela seMpilo okuyikho avukela khona,” kuchaza uMnu Ndimande.
Ebuzwa ngale indaba uMnu Moyo uthe yena wayedakiwe yikho waluma uSibanda kodwa wamxolisa njalo nguye obemlindile esibhedlela.
“Mina ngangidakiwe mhla ngize ngilwe loSibanda ngakho ngangingaqedisisi engangikwenza yikho ngamxolisa. Okunye njalo yimi engangimlindile esibhedlela ngesikhathi egula ngoba ngumngane wami ngakho ngiyathaba ngoba usengcono,” kutsho uMnu Moyo.
UMnu Sibanda ebuzwa ngendaba le uthe sebekhulumisene loMoyo ngakho ngeke akhulume lutho ngendaba le.
“Mina loMoyo sesikhulumisene salungisisa amaphutha ethu ngakho ngeke ngibalisele muntu ngokuthi kwahamba njani,” kuphetha uMnu Sibanda.
