uMthunywa
Nkosilathi Sibanda
KUVULWA isizini yeCastle Lager balutshwane ababekholwa ukuthi iqembu leChicken Inn lingenza izimanga, libalelwe kumaqembu azalwela inkezo enkulu.
Kuthe kuqhatshwa umqeqetshi kuzwa uRahman Gumbo akuzange kuthi dlwe kubathandi bomdlalo ukuthi nangu umqeqetshi osewabutha zonke inkezo kuleli lakwamanye amazwe. UGumbo uqale isizini exega, kwafika lesikhathi lapho ayesethuselwa ukuxotshwa umsebenzi ngoba eseqede imidlalo emihlanu iChicken Inn isehluleka ukunqoba.
Kumidlalo eyisitshiya galombili yakuqala, uGumbo wasadalala waphenduka umfana omncinyane kwezokuqeqetsha.
Loba ithimu yakhe yayiqinile, kwabanzima ukuthi athole okuyixegisayo, ikakhulu phambili kwegedi.
Umqeqetshi obalelwa kungcitshi eziphezulu kuleli, wakhetha ukuthi atshintshe inkundla yokudlalela ngokusuka eLuveve esiya eWhite City.
Ngokwenza njalo, amaGamecocks avuka khwatshu. Iqembu labuyela emgodini wayo weLuveve, kwaqala ukuphuma impumela esimangalise inengi labathandi labalandeli bakanobhutshuzwayo weCastle Lager.
UGumbo odume ngelithi “Rush” kunguqu, wayeseyitholile inkinga eseqenjini, wayilungisisa.
Lokhe isizini yembule ihlandla lesibili, uGumbo useguqule iChicken Inn yakholisa ukundiza phezulu kwengalane.
Amakhasi obulembu alithimu, lengxoxo ezikhitshwa ngabasekeli zibabaza umsebenzi owenziwe ngumqeqetshi lo.
IChicken Inn ayilabalandeli abanengi kodwa bakhona abamanye amaqembu abavuma ukuphumelela kwayo kulezi insuku.
Abalandeli sebevumelana ukuthi uGumbo uzabafikisa “eKhenani” njengalokho okwenziwa nguJoey Antipas ngesizini ka-2015.
“Siyakholwa ukuthi uRahman Gumbo uzaphinda lokhu okwenziwa nguAntipas (Joey). Inkezo ngeyethu bafowethu,” kutsho uRomeo Nkomo othe ungumlandeli wamaGamecocks.
UNelson Mwendo kubulembu beFacebook yeChicken Inn uthe: “Okuhle kuyabukwa, lonyaka iligi izaphetha kumnandi ngoba iChicken Inn ingathatha isicoco esikhulu kodwa ayiqaphele iDynamos leNgezi (Platinum). Phambili ngoRush.”
Kwamanye amakhasi okuxhumana ebulenjini, sekugcwele inkuthazo yokuthi iChicken Inn kumele isekelwe loba sekutheni.
Okwamanje, isimo sengalane yeCastle Lager siveza ukuthi inye ithimu engamhlupha kuligi — iNgezi Platinum eqeqetshwa nguTonderai Ndiraya.
Kumaviki amathathu kuvulwe isizini ngemva kwekhefu, uRahman useyethuselwe ngulumqeqetshi wezimbamgodi kuphela.
Ebuzwa ngendlela ayiphethe ngayo ithimu, umqeqetshi wamaGamecocks uthe usazibambile njalo kafuni “ukuphapha” isikhathi singakafiki.
“Umango mude lo, umsebenzi usasekhona. Angizitshayi isifuba njengalokhu okwenziwa ngabanye, mina ngingumqeqetshi osebenzayo hatshi ozenzisayo.
“Ukudlala kwethu kuvela ekuthini siyasebenza. Sihlose yona inkezo edlalelwa ngamathimu wonke esincintisana lawo,” kutsho uGumbo ekhuluma lentatheli le.
Kusenjalo, ngempelaviki elandelayo imidlalo yeCastle Lager iyaqhubeka, kungenwa kuviki lehlandla lemidlalo engamatshumi amabili lantathu.
UGumbo labafana bakhe banxusa iHwange FC eMagumeni.
