uMthunywa
YiNtatheli kaMthunywa
PHAKATHI kwayo yonke imidlalo encintiswa elizweni, umdlalo wenqindi usuthabise inkokheli zogatsha lwe-Sport and Recreation Commission ezibika ukuba ziyasuthiseka ngendlela umdlalo lo okhuthaza ngayo intsha yakuleli.
Umdlalo we-boxing usuvuke khwatshu lokhe iSRC yaphawula uhlelo lokuvuselelwa kwemincintiswano kuzigaba zonke olwe-Community Sports Development Programme. Ngaphansi kwaloluhlelo, abasakhulayo abasezikolo lalabo abangela misebenzi kodwa belethalenta, sebesenelisa ukuchitha isizungu ngokwakha umzimba lokuphendla amathuba agcweleyo.
Kwake kwaba lesikhathi lapho umdlalo we-boxing owabhidlika khona, sekusehlulekwa lokubumba iqula labajiki benqindi abadlalela isizwe.
UJoseph Muchechetere osabambe isikhundla sikamqondisi wenhlanganiso yeSports and Recreation Commission ubike ukuba kuhle ukubona ukukhula kwemidlalo efana lenqindi ngoba sekukhanya ukuthi umdlalo lo udonsa abantu abanengi njalo ulakho ukuguqula impilo zabadlali.
UMuchechetere ubikele iphephandaba likazulu edolobheni leHwange ngoMvulo ukuba ukuvuka komdlalo lo kumele kulandelwe ngezinye inhlanganiso zemidlalo.
Inhlanganiso yeSRC yachitha ibhodi yakudala yalinhlanganiso eyayikhokhelwa nguRichard Hondo ngomnyaka ka-2014 ngoba ingenzi kuhle.
“Kuyathabisa ukuthola ukuba ikhona imidlalo etshisekela ukusebenza labantu abasakhulayo. Impumelelo kuyo yonke imidlalo isukela ekulolongeni ithalenta elisakhula. Umdlalo wenqindi usuthola usekelo lwabalandeli, okuyikhona okuveza ukuthi umdlalo lo usumemetheka emphakathini. Njengenhlanganiso yeSRC sikhankasela ukuthi yonke imidlalo ilandele uhlelo lwethu lokufundisa uzulu ngokuqakatheka kokuphatheka kwezemidlalo,” kutsho umphathi weSRC lo.
UMuchechetere uqhubeke wathi: “Akulula ukusukumisa umdlalo ongelasekelo kodwa nxa abantu bewugcwalela umdlalo we-boxing kundawo ezitshiyeneyo, kutsho ukuba losekelo lwemali lungeza. Ngiyathokoza ngokuthi ama-stakeholders ahlangene njalo okuqakathekileyo yikuthi abantu kumele bacebisane.”
Ngemva kokuchithwa kwebhodi yakudala, ugatsha lukamphathintambo wemidlalo kuHulumende lwakhuthaza inhlanganiso yeSRC ukuthi iphume lenye ibhodi ezamela i-boxing le-wrestling ngokugcweleyo.
