uMthunywa
Nomthandazo Ndlovu
INHLANGANISO yeVeterinary Services ikhuthaza abalimi ukuthi badibhise inkomo zabo ukuze zingabanjwa yimikhuhlane.
Ekhuluma loMthunywa uDokotela Enart Mdlongwa weVeterinary uthe kuqakathekile ukuthi abalimi badibhise inkomo ukuze zingahlaselwa yimikhaza.
“Kuqakathekile ukuthi abalimi badibhise inkomo zabo ukuze zingahlaselwa yimikhaza ngoba iyingozi ezifuyweni,” kutsho uDkt Mdlongwa.
UDkt Mdlongwa uthe abalimi kumele balandele inhlelo zokudibhisa inkomo zabo ngoba ukudibhisa akufanani umnyaka wonke, kutshiyana ngesigaba somnyaka.
“Umlimi kumele alandele inhlelo zokudibhisa inkomo zakhe ngoba ukudibhisa akufanani umnyaka uze uyephela, khathesi izulu lingakani inkomo kumele zidibhe kabili ngenyanga,” kuchaza uDkt Mdlongwa.
“Nxa izulu selisina inkomo kumele zidibhe maviki wonke ngoba ngaleso isikhathi yikho lapho imikhaza echamisela khona isizalana isiba minengi ngakho-ke kuqakathekile ukuthi inkomo zidibhe maviki wonke,” kuqhuba uDkt Mdlongwa.
UDkt Mdlongwa uqhubekele phambili wathi kulemikhuhlane ehlasela inkomo nxa zingeqa ukudijiswa okumele abalimi bayinanzelele ngoba ingazibulala.
“Kulemikhuhlane eminengi ebangelwa yimikhaza engahlasela inkomo nxa zingasadijiswanga egoqela i-heartwater leGall sickness. Imikhuhlane le iyingozi ezifuyweni ngakho kumele abalimi babelesiqiniseko sokuthi bayadibhisa inkomo zabo isikhathi zonke belandela inhlelo zokudibhisa,” kuchaza uDkt Mdlongwa.
UDkt Mdlongwa uphethe ngokuthi nxa inkomo isihlaselwe yimikhuhlane le ebangelwa yimikhaza kulamajekiseni okumele bazihlabe wona kodwa bakhuthaza ukuthi badibhise inkomo zabo ukuze bangafiki ezingeni lokugulelwa zinkomo ngenxa yokungazidibhisi.
