Inhlupho zalamuhla: Kathengi lutho endlini

24 Aug, 2017 - 12:08 0 Views
Inhlupho zalamuhla: Kathengi lutho endlini

uMthunywa

Kathengi lutho endlini
Umbuzo: Sileminyaka emibili sithandana lejaha lami. Ngomnyaka odluleyo waxotshwa umsebenzi. Bengisenza konke ukuthi angasweli lutho ngesikhathi engasebenzi. Bengimncedisa ukudinga umsebenzi waze wacina ewuthola ekuqaleni komnyaka. Kwaba yikuqala kwezinkinga phakathi kwethu.

Satshintsha isimo endlini, bekungathi kasuye lo engimaziyo. Nxa nje eke wahola kuba yikucina kwami ukumbona, abuye engaselamali. Akathengi ngitsho isinkwa lesi endlini. Ngiyakhathazeka kakhulu ngoba bengicabanga ukuthi ukuthola kwakhe umsebenzi kuzakwenza isimo sibesihle phakathi kwethu. Ngenzenjani ukubuyisela izinto esimeni esejwayelekile?

Impendulo:
Kwaze kwadanisa-ke lokhu. Iqiniso yikuthi ngeke uthi umuntu uyamazi. Kwesinye isikhathi kuyenzeka ukuthi ukuhlupheka yikho okumenze waguquka. Kungenzeka ukuthi lokhu okwenziwa lijaha lakho kuyedlula. Akakujwayeli ukuzimela futhi abe lemali ethi yena okwenza adideke. Kujwayelekile ukwenzeka lokhu.

Esikhathini esinengi nxa usujayele ukungabi lemali ukubakhona kwayo kuba yinkinga. Abanye bazebathathe izinto ngamawala. Baze bakhohlwe izinto ezibalulekileyo empilweni. Hlala phansi laye umtshele ngokungaphatheki kwakho. Nxa ekulwisa, kuzabe kuchaza ukuthi akwenzayo ukwenza ngabomo. Iminyaka emibili kwabathandanayo yisikhathi esaneleyo ukubona ukuthi likulungele yini ukutshada.

Ngakho kubalulekile ukulungisa inkinga ezinjengalezi lingakabophi ifindo lomtshado. Kuhle lokhu okwenzayo ukuthi  nxa ubona izimpawu ezimbi ufune ukusizakala. Kutshengisa ukuhlakanipha okukhulu. Zama ukukhulumisana laye. Ngilethemba lokuthi uzaguqula indlela asephila ngayo mzukulu kodwa nxa engasakwenzanga lokho wena sokumele uzikhethele ukuthi uyafuna ukuphila impilo le na?

Ukuphinga komkami sokungenza ngizeyise
Umbuzo: Ngingowesifazane oleminyaka engu-30, otshadileyo olabantwana ababili emtshadweni. Ngiyamthanda umkami kakhulu. Uyikho konke kimi. Ulothando, uyasinakekela futhi ungubaba oqotho. Iyodwa nje inkinga.

Akathembekanga ngitsho emtshadweni wethu. Sengimbambe amahlandla amathathu etshengisa ukungathembeki kumi. Njalo nxa ngimbamba uyaxolisa athembise ukuthi akasoze aphinde akwenze ukungathembeki. Ngiyamxolela njalo  nxa ngimbambile. Kodwa sekusibanzima kimi ukumela lesi simo. Ngizithwele, isisu silezinyanga eziyisithupha.

Sengiphinde ngambamba futhi lomunye umuntu wesifazane. Angisazi ngenzenjani, noma ngithini. Sengihlezi ngizibuza ukuthi kuyini okumenza angathokozi ngami. Kwenziwa yini ukuthi ahlale efuna abanye abantu besifazane ngikhona? Ngisiza angisazi ngenzenjani ngomkami.

Impendulo:
“Kwenziwa yini ukuthi ahlale efuna abanye abantu besifazane ngikhona?” Mzukulu lokhu kwenziwa nguwe. Nguwe owamjayeza ukuthi akutsho lutho ukuphuma phandle etshadile. Nguwe omkhuthazayo ngalesi isenzo sakhe. Nguwe omamukela ngezandla ezimhlophe njalo nxa umbambile. Ukwenzelani lokhu?

Uyamkhuthaza ukuthi akwenze njalo ngoba uyazi ukuthi uzamxolela. Umuntu uyazikhethela ukungathembeki njalo uyazi mhlophe ukuthi wenzani. Nguwe okhetha ukumthanda yena elezenzo ezimbi ezikhomba ukungakuthandi, ukungakuhloniphi kanye lokungakhuli kwakhe. Ngamanye amazwi utshade lengane, engazihloniphiyo yona. Lokhu kungazihloniphi kwayo sekwenze lawe ukuthi ungazihloniphi.

Uzwa njani wena ukutshada lendoda engakuhloniphiyo futhi engawukhathaleliyo umtshado wayo? Usuke walubika nje loludaba kwabakini, noma abakibo kumbe komunye elimhloniphayo lina lobabili? Kubalulekile njengomuntu wesifazane ukuthi uzihloniphe ngokuthi ungabekezeleli into engekho. Nguwe okumele uthathe isinqumo sokuthi, sekwanele. Umkakho uzakwazi ngalelolanga ukuthi awudlali.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds