uMthunywa
ZIJULUKA njalonje ezimnandi kuphephandaba likazulu nanko phela kule iviki lifukule elinye iqembu elingena enkundleni kuxege ibhulugwe lendoda kwezomculo. Leliqembu ngelomculo we-rhumba iDubia Masters edabuka kwelePlumtree noma nje kwezomculo ivame ukutholakala phetsheya.
Kalitshayi nje isiginci leliqembu lenza iziga bakwethu. Emlonyeni kangikhuluma amajaha akhona angena kuwe izindonga zeJericho ngokwazo. Kambe kungaba ngubani uMqondisi waleliqembu ngaphandle kuka Interlect Sola ijaha elimajaha mabili. Othanda ukuzizwela ngaleliqembu nansi ingxoxo egijimisa igazi phakathi kwentatheli yephephandaba likazulu uCornelius Luphahla (CL) loMqondisi waleliqembu uInterlect Sola (IS).
CL: Jahalakithi akuchazele uzulu ukuthi leliqembu lalisungula kutheni?
IS: Leliqembu lasungulwa ngamajaha ayedlala leqembu leNdolwane Super Sounds uKholwani Dube lo Alfred Sibanda kwathi ngo2010 aselisungula leliqembu ngemva kokudabuka phakathi kwaeNdlolwane.
CL: Njengeqembu eselidume kangaka selahwatsha amadlalade amangaki mfoka Sola?
IS: Lokhe sasungula leliqembu sesakhipha amadlalade amahlanu. Elakuqala salikhipha ngo2010 elithi Uyisithuth’ esinjani, kwalandela elika 2013 elithi Sithuli Siyezwa, esalikhipha loPrecious Manyonyoba. Salandela ngelika 2014 elithi Mfuniseni, salandela ngelika 2015 elithi Umhleli Wazo, sasesicina ngelika2017 elithi Umum’ Untshintshile.
CL: Iqembu lenu lilamalunga amangaki njalo landise ukudlalela ngaphi ingoma zenu?
IS: Iqembu lethu lilamalunga ayisikhombisa agoqela uKholwani Dube, uAlfred Sibanda, uMike Ncube, uWiseman Moyo, uMthokozisi Ngwenya, uClayton Shoko kanye lo Tinashe Masiye.
Ngalokhu ingoma zethu sivame ukuzidlalela kweleSouth Africa endaweni ezehlukeneyo ngoba yikho esiphila sikhona. Siyenelisa njalo ukudlala emitshadweni, kuma shows kanye lasemidlalweni esthiyeneyo.
CL: Abantu bathini ngomsebenzi wenu njalo likhangelele ukubenzelani lonyaka?
IS: Abantu bayawuthakazelela kakhulukazi umculo wethu bathi siqhubekele phambili sibajabulisa ikakhulu ingoma yethu ekudlalade lalonyaka ethi Umum’ umntshintshile yiyo esiphakamise kakhulu kwezomculo. Ngalokhu sikhangelele ukubavakatshela endaweni ezehlukeneyo kanye lakwelakithi siyebenzela ama-shows ukuze basibone ngamehlo abangasaziyo.
CL: Nhlupho bani eliyake lihlangane lazo kwezomculo njalo nkuthazo bani eliyipha abaculi abasasungula?
IS: Ubunzima esiyake sihlangane labo kwezomculo yikuswela imali yokuzithuthukisa ikakhulu ngesikhathi sisasungula leliqembu. Okunye njalo yikuthi silamathuba amalutshwane okuthi sivakatshele abalandeli bethi endaweni ezitshiyeneyo ngenxa yomsebenzi.
Ngalokhu kubaculi abasasungula ngithi kababambelele noma kunzima ukuze bathuthuke ngoba kuvele kunjalo emculweni kunzima.
