uMthunywa
Cornelius Luphahla
KUZABE kusindwe ngobethole kuduma uladuma eBulawayo Theatre lapho okuzabe kuhlangene khona amaqembu omculo wesicathamiya ayisikhombisa ngenjongo yokuthuthukisa umculo lo.
Umkhosi lo uzakuba khona ngoMgqibelo lapho amaqembu agoqela Ukukhanya Kwezwe, iGreat Stars, Impumelelo Shinning Stars, Black Umfolosi, Sunduza Dance Theatre, Men of Influence kanye laMaqhawe Enkosi, azathubulana khona kusukisela ngehola lesihlanu ntambama kuze kuyetshaya ihola letshumi ntambama.
Amaqembu la asungula inhlanganiso ethiwa yiRise Chothoza Mfana okuyiyo azibiza ngayo nxa ehlangene.
UMthunywa uxhumane lomsekeli kaMgcinisihlalo walinhlanganiso uSamuel Donga wathi inhlanganiso le bayisungula ngenjongo yokuthuthukisa umculo wabo.
“Inhlanganiso yethu le siyisungule kumnyaka ophelileyo ngemva kokunanzelela ukuthi umculo wembube usutshabalala ngakho silethemba lokuthi nxa sesibambene njengamaqembu omculo lo sizawuphakamisa.
Ngokunjalo kule inhlanganiso sisawadinga amanye amaqembu acula isicathamiya ukuthi abe ngamalunga ayo ukuze sithuthukise umculo wethu,” kutsho uDonga.
Ekhuluma lentatheli uCharles Banda uthe uyajabula kakhulu ngomkhosi lo wakhuthaza uzulu ukuthi abekhona ukuze umculo lo uthuthuke.
“Mina ngiyajabula kakhulu ngomkhosi lo njalo ngikhuthaza uzulu ukuthi abuye azozibonela ukudla kwamehlo loluju lwendlebe. Lokhu kuzakwenza ukuthi umculo wethu uthuthuke ngamandla. Ngalokhu umkhosi lo siwenza okwesibili ngakho sesizabe siwenza minyaka yonke ukuze uzulu ajabule minyaka yonke,” kutsho uBanda.
UMayibongwe Madihwa ongomunye wabahlleli kule inhlanganiso uthe emkhosini lo kuzabe kulamadlalade ethengiswayo abantu babuye bezilungiselele.
“Emkhosini wethu lo sizabe siledlalade leRise Chothoza Mfana azabe etholakala kumaqembu ethu wonke. Idlalade leli salipheka singamaqembu wonke azabe ekhona emkhosini lo woyisikhombisa. Ngalokhu abantu kabalindele okukhulu ngalelolanga,” kuphetha uMudihwa.
