uMthunywa
Cornelius Kandaba Luphahla
INKAMPANI yeSeedCo isikhiphe omunye umhlobo wenhlanyelo yomumbu obizwa ngokuthi yi-Elephant Category wona okubikwa ukuthi ulakho ukutholisa abalimi isivuno esiphezulu.
Inhlanyelo yomumbu le, ethi SC 727, SC 719 le SC 709 kubikwa yenziwe ngendlela ezaphathisa abalimi ukuthi bathole isivuno esiphezulu.
UMnumnzana Social Shava onguAgronomist omele izabelo zeMatabeleland North leMatabeleland South, ubikele intatheli zindaba, ukuthi inhlanyelo le isungulwe ngomnyaka ophelileyo.
“Inhlanyelo le ivuma kakhulu kundawo ezikuRegion 1, 2, lakuRegion 3 lapho okuna khona izulu elinengi. Iyavuma njalo kuma-irrigations ngoba kuyabe kutholakala amanzi kunye lomquba olingene umhlobo wale inhlanyelo,” kuchaza uMnu Shava.
Uqhubekele phambili wathi inhlanyelo le ingalinywa lapho okulezulu elincane kodwa kudingeka ukuthi izilimo zakhona zithelelwe ukuze izilimo zithole amanzi eneleyo.
Kubikwa inhlanyelo le ithatha amalanga angaba ngu- 150 kusiya ku- 160 ukuze ilungele ukuvunwa.
UMnu Shava uveze njalo ukuthi umlimi engasebenzisa le inhlanyelo ulakho ukuthola isivuno esiphezulu.
“Inhlanyelo le iletha isivuno esingaba ngamathani asukela ku-14 kusiya ku-18 kuhekitha yinye ngayinye. Lokhu kuveza sobala ukuthi inhlanyelo le ilesivuno esikhulu okwedlula ezinye ngoba inhlanyelo ekade kuyiyo elesivuno esikhulu yi SC 608 ekhipha isivuno esiqala kumathani angu-12 kusiya ku-13 kuhekitha.
UMnu Shava uveze ukuthi inhlanyelo le izatholakala ezitolo kusukela ngoNhlangula kusiya phambili.
Ubuye njalo wathi abalimi bakhululekile ukuyathapha ulwazi ngokusetshenziswa kwenhlanyelo le kubalimisi endaweni zonke jikelele kunye lakundawo ezifana le Farm City koBulawayo.
Izilimo zale inhlanyelo kubikwa akumelanga ziminyaniswe nxa zihlanyelwa njalo zifuna ukuhlakulelwa ukuze isivuno sibe phezulu njalo zingahlaselwa yizibungu ezigoqela imihogoyi, kunye lemitshiphela.
