uMthunywa
YiNtatheli kaMthunywa
UMDLALO we-boxing ungabe udonsa nzima kodwa bakhona abadlali bayo abaphuma koBulawayo asebetshayelwe ihlombe ngokuphumelela abakwenzayo.
Kumaviki amabili adluleyo kubonakele kubathandi labasekeli bomdlalo ukuthi iLobengula Boxing Club ihamba phambili ngokujika inqindi.
ILobengula Boxing Club isibuse yonke imincintiswano yakoBulawayo njalo abadlali abangaphansi kwayo sebedlalele iZimbabwe enkundleni ezinengi.
Ibizo leqembu leLobengula Boxing Club liqanjwe labaphezulu kuwo wonke alolonga koNtuthu.
Usaziwayo kweze-boxing koBulawayo uEli Sango uthe sekuyisikhathi sokuthi umdlalo lo uthole usekelo olupheleleyo.
“Imali sekumele ingene ku-boxing nxa kusiba labadlali abenza kahle njengabeLobengula Boxing Club. Ayisiyo yodwa lindawo elolonga abadlali ngoba zikhona intshantshu lakwezinye inkundla.
“Okumele sikwenze yikuhlanganisa imali esilayo, sivule isikhwama esizasekela imincintiswano yethu,” kutsho uSango.
Umphathintambo wezemidlalo kuHulumende uMakhosini Hlongwane waphuma kumaphephandaba ngoNhlangula ebika ukuba imidlalo efana le-boxing kumele ithole usekelo oluvela kumabhizimusi. Wabika ukuba akula eyinye indlela ithalenta elingaphakanyiswa ngayo ngaphandle kokuncedisa ngemali.
Abadlali ababatshazwa kakhulu kulumnyaka babalisa uCaroline Dube loWiseman Tshuma abadlali abalolonga ngaphansi kweLobengula Boxing Club abancintise enkundleni ze-Zone Four African Confederation Championships edolobheni leLubango eAngola.
UDube oleminyaka engamatshumi amabili lantathu yokuzalwa watshaya izitha zakhe zonke wathola imendulo yegolide kuhlandla le-welterweight kumantombazana. Lo kwakungumncintiswano wakuqala kuDube ukuthi adlale phetsheya kwelizwe.
Ekhuluma lentatheli kuliviki, uDube uthe wayelovalo mhla engena esitikini ngenxa yokuthi wayechinsa ukumela isizwe kodwa ubonga ukukhuthazwa ngabaqeqetshi bakhe abamenze wabalesibindi sokuwisa abanye.
“Ngangiqala ukuncintisa embuthanweni omkhulu njengalo. Ngithanda ukubonga abaqeqetshi bami ngokungiqinisa lokungifundisa ngokumele ngikwenze kulumdlalo ukuze nginqobe.
“Ukuthola kwami igolide kungitshengise ukuthi ngiyintshantshu njalo ngilekusasa enhle kumdlalo we-boxing. Sengilungiselela ukuthi ngiyephambili ngokumela isizwe,” kutsho uDube.
Kuhlandla le-bantamweight uTshuma uphume lemendulo ye-bronze lapho okubikwa bekungekho lula kubadlali abanengi. UTshuma uthole imendulo le ngemva kweminyaka emithathu esehluleka ukuthi ayithole.
“Ngomnyaka ka-2013 ngancintisa kuma-Zone Four African Confederation Championship kwehlula ukuthi ngithole imendulo. Ngangitshaywa sikhathi sonke. Ngancintisa laseZambia kwehlula futhi. Ngemva kokulolongwa kakuhle eLobengula Boxing Club ngiphumelele kakhulu ngaze ngafinyelela lumncintiswano.”
Bobabili laba bayingxenye yeqembu elimele isizwe eligoqela uCasper Mkandla odume ngokuba yingqwele kuhlandla le-lightweight, uZibusiso Nyoni loBrendon Denes ojika ingqindi ku-flyweight.
UFreeman Mavongwe owe-middleweight, uClever Sithole otshaya kuhlandla labakhulu ele-heavyweight loMelisa Matanire kwabesifazane ngabanye abathunyelwe eAngola loba nje bengazange bephenduke bethwele imendulo.
