uMthunywa
AMALUNGISELELO omqhudelwano wamazwe kumdlalo wenguqu owe-Cosafa yabomama aseqoqwe kakuhle kuthi iqula elibona ngokuqhutshwa kwemidlalo le selibike ukuba sebelungele ukwamukela amaqembu kulumncntiswano.
Imidlalo le iphenduka koBulawayo ngemva kweminyaka eyisithupha yacina ukwenziwa.Inkezo le, ezadibanisa amazwe alitshumi lambili izaqala mhlaka 13 kusiya ku-24 ngoMpandula enkundleni zeBarbourfields laseLuveve.
Iphephandaba likazulu lixhumane lomsekeli kamongameli wenguqu yabomama kuleli kunhlanganiso yeZimbabwe Women’s Soccer, uSamukeliso Silengane, obike ukuba ukuqhutshwa kwemidlalo le koBulawayo kuyisibonelo sokuthi ilizwe liya phambili ngokukhankasela inguqu yabomama.
“Ukuqhutshwa kwemidlalo yenguqu yabomama eyeCosafa kusifaka kuzinga eliphezulu kakhulu. Kutshengisa ukuba inguqu yabomama kuleli iqhutshwa ngendlela elohlonzi njalo ilekusasa elikhanyayo. Kusegcekeni ukuba izwekazi leAfrica liyahlonipha indlela esidlala ngayo lendlela esiqhuba ngayo imincintiswano yethu.
Ngeviki edluleyo uMthunywa ubeyingxenye yequla elethekelele inkundla zeLuveve laseMagumeni lapho iziphathamandla zeCosafa ezikhangelisise isimo senkundla lapho okuzadlalelwa khona.
Ekuhambeni kwazo, iziphathamandla zincome kabanzi izakhiwo zenkundla loba nje zikhalaze ngokuthi kungani isimo sezambuzi lezindlu zamathimu siphansi.
Isikhulu senhlanganiso yeCosafaA uSue Destombes ubike ukuba akaboni lutho olungabuyisela emuva ukuzimisela kweZimbabwe ukuthi iphathe imidlalo yenkezo le.
“Siyathaba ukuthi iZimbabwe izimisele ukuqhuba imidlalo yethu yeCosafa Senior Women. Kubalulekile ukuthi kwaziwe ukuthi inkundla lezi (BF le Luveve) zilungele ukuphatha imincintiswano,” kutsho uDestombes.
Kusenjalo, iphephandaba likazulu lithinte umaneja wabonompembe kulinkezo yamazwe uFelix Tangawarima mayelana ngokukhethwa kwabonompembe abazi umsebenzi.
Umaneja lo uthe kusenhlelweni zabo ukuthi banxuse onompembe bakuleli ukuba bangene emakilasini bekhumbuzane ngemithetho yomdlalo.
Ngemva kokuvakatsha kukaDestombes lezinye izikhulu zeCosafa, kuvele ukuba kulokukhathazeka ngokukhitshwa kwempahla enkundleni zeBF leLuveve. Impahla le yayifakwe ngesikhathi idolobho lakoBulawayo liphethe imidlalo ye-African Union Sports Council Under 20 Youth Games ngomnyaka ka-2014.
Impahla ebalisa amasofa lezibane zatshontshwa kulimidlalo.
