uMthunywa
Cornelius Luphahla
UMCULO kamaskandi uthuthuka ngamandla kuleli nanko phela omunye umculi wodumo kwezikamaskandi usehwatshe elinye njalo idlalade elihlabekisa uzulu.
UMihingo Gumbo owaziwa ngokuthi liBhantinti Elitsha abuye njalo abizwe ngokuthi yiPlumtree King, uncindezele idlalade lakhe lesithathu kuviki ephelileyo elilesihloko esithi, I-SMS yeX.
Lelidlalade ulihwatshe ngemva kokukhipha amanye amadlalade amabili elika2015 elilesihloko esithi Intandane lelika2016 elilesihloko esithi Sohlala Kahle.
UMthunywa uxhumane lomculi uBhantinti Elitsha wathi idlalade lakhe lifundisa uzulu ngokuphathana kuhle kwabantu kanye lokuphakamisa ezomculo.
“Idlalade lami lilengoma ezingu-15 njalo zonke zilemfundiso enkulu kakhulu kuzulu. Enye yalezingoma ikhuthaza uzulu ukuthi aphakamise wonke umuntu osebenza ukubajabulisa kungakhathalekile ukuthi ngumlobi kumbe yimbongi.
“Kukhona njalo ekhuluma ngokuphathana kuhle kwezothando hatshi ukuba labomakhwapheni. Enye ikhuluma ngobubi bokufa osokuqede abantu emhlabeni. Konke lokhu kuyizixwayiso kuzulu ukuthi akunanzelele ngoba kuyingozi,” kutsho iBhantinti Elitsha.
UMihingo uqhubekele phambili wathi uzavakatshela abalandeli bakhe endaweni ezehlukeneyo ebazwisa idlalade leli.
“Njengoba sengikhiphe idlalade lami elitsha khathesi sengizaqala ukuvakatshela abalandeli bami endaweni ezehlukeneyo ngibazwisa idlalade lami elitsha. Njengoba khathesi ngiphila kweleSouth Africa ngizavakatshela lakwelakithi ngiyebajabulisa khona.
“Okunye futhi ngikhuthaza abaculi bonke ukuthi bengaze baxabana kwezomculo kodwa kabasebenze ngokubambana baphakamisane ukuze bathuthuke kwezomculo. Ngitsho ngoba abanye abaculi kabajabuli nxa bebona abanye bekhipha amadlalade, okuyinto embi kakhulu,” kuphetha iBhantinti Elitsha.
