uMthunywa
AMAPHOLISA kamansipala weKurhuleni asebophe abasolwa ngokuthinteka ecaleni lokubulawa kobengumlingisi weRhythm City uDumi Masilela.
Lumlingisi oleminyaka engu-29 udutshulwe wabulawa ekuqaleni kukaNcwabakazi bethatha imota yakhe eTembisa, eGoli.
USodolobho weKurhuleni uMnumzana Mzwandile Masina uthe amapholisa kamansipala laweSaps asebenza ubusuku lemini ukuzama ukuthola abasolwa abathinteka kuleli cala.
“Ngingaqinisekisa ukuthi bakhona asebebotshiwe. Saziswe ngamapholisa omkhandlu ukuthi abasolwa babanjwe ngosizo obeluvela kumalunga omphakathi, basiwa enkambeni yamapholisa lapho abavulelwe khona icala,’’ kutsho uMasina.
Isibalo sababotshiweyo besingakaqinisekiswa. UMasina uqhube wathi amapholisa asazoqhubeka aphenye ngalelicala ukuze baqinisekise ukuthi kubotshwa bonke abathintekayo kutholakale lobufakazi.
UDumi, ubekwe ngoMgqibelo, utshone mhlaka 3 Ncwabakazi ngemva kokudutshulwa yilabo akade befuna ukutshontsha imota yakhe eTembisa. UDumi wafela esibhedlela.
Utshone edlala indawo kaSifiso Ngema kuRhythm City ekhonjiswa ku-e.tv ngo-7 ebusuku ngoMvulo kusiya ngoLwesihlanu. — Ubulembu
