uMthunywa
Nomthandazo Ndlovu
ZIKHALA ezimathonsi izakhamizi zesigabeni seZezani eBeitbridge ngembuzi zazo ezitshontshwa mihla yonke kutholakala amakhanda lezangaphakathi kuphela egangeni.
Kubikwa izibaya zezakhamizi ezinengi zakule indawo sezibetha umoya nanko phela imbuzi zazo zitshontshwa nsukuzonke inyama isiyathengiselwa omakorokoza abaseduze laleso sigaba.
Ekhuluma loMthunywa uSithandazile Ndou oyisakhamuzi kuleyo ndawo uthe sebethwele nzima ngabantu abatshontsha imbuzi zabo besiyathengisela omakorokoza.
“Asisakwazi ukuthi senzeni ngezifuyo zethu njengoba zingaphuma ekuseni zisiya emadlelweni ziphenduka sezingasenelanga ezinye sezitshontshiwe khonale egangeni,” kutsho uNkkz Ndou.
“Abantu abantshontshayo ngabanye bethu khonapha abayizakhamizi bayethengisela omakorokoza abasemfuleni uMzingwane, kuthiwa lapho yikho ethengiseka lula inyama le njalo ababuzi lokuthi ivela ngaphi ihle iphele nje ngokuphangisa,” kuchaza uNkkz Ndou.
UMthunywa uzwe ukuthi izigangi lezi ezitshontsha imbuzi zezakhamizi zitshontshela imbuzi lezi emadlelweni bahle bazihlinze khonale bahambe sebethwele inyama sisiyathengiswa kubomakorokoza
“Amasela lawa ayakwazi ukuthi amathumbu, inhloko kanye lamangqina kuyasetshenziswa ukuloya umuntu yikho bekutshiya egangeni ngoba bangezwa sebekhala imbuzi eziswini,” kuchaza uNkkz Ndou.
Kubikwa kulesinye isakhamuzi esesitshontshelwe imbuzi ezilitshumi lanhlanu sathola ngamakhanda, amathumbu kanye lamangqina kuphela sebehlinze batshaya utshani.
“Omunye umakhelwane wethu utshontshelwe imbuzi ezilitshumi lanhlanu, uthe sezidinga egangeni wezwa ngezinja zakhe sezisilwa wagijimela khona wathola zibanga amathumbu lenhloko okwakutshiywe yizigangi lezi,” kuchaza esinye isakhamuzi esiziveze ngokuthi nguMnumzanaThato Muleya.
“Uthe senanzelele ukuthi ngezakhe wabiza ezinye izakhamizi balonda inyawo ezazilapho zaze zayaphelela lapho okwakhe khona omakorokoza laba. Esingasakwaziyo yikuthi ngomakorokoza abatshontshe imbuzi lezi kumbe ngabanye bethu khonapha esakhelane labo.
“Thina esikucelayo njengezakhamizi yikuthi abakhokheli bethu baxotshe omakorokoza laba singakaphelelwa zimbuzi zethu,” kutsho uMnu Muleya.
UKhansila weZezani uNkosikazi Gladys Tlou uthe udaba lokutshontshwa kwembuzi uyalwazi sibili kodwa ezilitshumi lanhlanu ubengakezwa ngazo.
“Imbuzi ukutshontshwa ziyatshontshwa sibili kodwa udaba lwalezi ezilitshumi lanhlanu bengingakaluzwa, sisalungisa ukuthi sihlangane losobhuku kanye labakhokheli besigaba ngodaba lolu ukuze sizwe ukuthi izakhamizi zithini ngohlupho lolu,” kuphetha uNkkz Tlou.
