uMthunywa
IQHAWE ngumuntu oqakathekileyo kakhulu elizweni. Ukuze umuntu kuthiwe liqhawe uyabe elisebenzele ilizwe lakhe. Kukhulunywa ngomuntu owakhetha ukufela ilizwe lakhe, umuntu ongazange abe lendaba lokuthi uyafa kumbe hatshi. Umuntu owafulathela imuli yakwabo.
EZimbabwe lapha kukhulunywa ngomuntu owakhetha ukungena igusu etshiya ubunkanyankanya efuna ukukhulula abanye bakhe abansundu ababethwaliswe nzima ngamakhiwa. Kukhulunywa ngomuntu owayezimisele ukukhulula abantu abansundu.
Ukukhumbula amaqhawe yinto eqakatheke kakhulu emazweni ake abuswa ngamanye. Amazwe amanengi awe-Africa alwa kakhulu esilwa labamhlophe ukuze azibuse. Abantu ababesemazweni la awe-Africa ayengaphansi kombuso wabacindezeli babehlupheka kakhulu, babethwele amagabha avuzayo. Ngakho-ke wonke umuntu owalwa kumbe owancedisa ukuthi uchuku lolu olungelandiswe luphele uyaqakathekiswa. Kuthi abafayo bezama ukukhulula amazwe abo bayakhunjulwa minyaka yonke kubabazwa umsebenzi wabo wokuletha uzibuse.
NgoMvulo kuyonale iviki eZimbabwe besikhumbula amaqhawe akithi adlulayo emhlabeni lamanye asaphila siwabonga ngomsebenzi abawenzayo wokukhulula ilizwe lakithi.
Besikhumbula abantu abanjengaboDokotela Joshua Mqabuko Nkomo, oNikita Mangena, oJosiah Tongogara, oSally Mugabe, oJason Ziyaphapha Moyo, oLeopold Takawira, oHebert Chitepo, oGeorge Silundika, oNaison Khutshwekhaya Ndlovu labanye abanengi. Sibonga njalo lamanye asaphila afana loMongameli welizwe uKhomuredi Robert Mugabe.
Manengi ngempela amaqhawe akhulula ilizwe lethu njalo okusemqoka ngobuqhawe babo yikuthi ubuqhawe kabuthengwa kodwa ngumsebenzi abawenzayo empini yenkululeko.
Ukuze umuntu kuthiwe liqhawe nje ngumuntu lowaya owafaka impilo yakhe engozini ukwenzela ukuthi uzulu akhululeke hatshi ukuthi yena athole imali kumbe aphakanyiswe.
Kuyajabulisa ukuthi lonyaka sikulelikhefu lokukhumbula amaqhawe kanye lelokubonga ababona ngomvikela welizwe, iDefence Forces, uMongameli welizwe ubesenza imihlangano kuzabelo zakuleli lapho abehlangana labatsha bakuleli ukuze abafundise ngobuhle bokulondoloza inkululeko lokuthi kungani kungamelanga batshaphaze ilizwe.
Sikhumbula njalo ukuthi la ngamaqhawe ngempela ngoba kabazange bathengwe ukuthi bayekulwa.
Babengaqhatshwanga futhi. Babefuqwa yisifo esasisezinhliziyweni zabo sokufuna ukukhulula ilizwe leZimbabwe.
Kuqakathekile-ke ukuthi kulelikhefu, sikhumbule njalo ukuthi leli likhefu eliqakatheke kakhulu ngoba kungayisibo lababantu esibakhumbulayo aluba akula nkululeko elizweni lethu.
Singenza njalo ilizwe lethu lizaphumelela ngoba wonke umuntu uyabe esebenzela ingqubela phambili.
