Uncategorized

Siyawabonga amaqhawe

18 Aug, 2017 - 12:08 0 Views
Siyawabonga amaqhawe Khmrdi Tshinga Dube

uMthunywa

Cornelius Luphahla
BEKUSINDWE ngobethole emkhosini wokuthakazelela amaqhawe elizwe ngenhloso yokuvuselela imbali kanye lokuveza ukuqakatheka kwembali yesizwe kuleli.

Umkhosi lo obungoMvulo uthakazelelwe eNkulumane lapho okuleProvincial Heroes Acre langoLwesibili eWhite City Stadium koBulawayo kanye lakwezinye indawo ezehlukeneyo lapho izizalwane zakuleli ebezibonga ukuzinikela kwamadoda lamadodakazi akuleli.

UMthunywa uxhumane loMinister of Welfare Service for Veterans, War Collaborators and Political Detainees uKhomuredi Tshinga Dube oveze ukuthi amaqhawe aqakathekile kakhulu wabuya njalo wakhuthaza uzulu ukuthi abonge amaqhawe ngomsebenzi awenzayo.

“Uzulu kufanele azigqaje ngamaqhawe akhe ngoba yiwo aletha inkululeko kuleli. Ngalokhu siyawabonga amaqhawe ngoba alwa impi yenkululeko asilethela iZimbabwe elokuthula. Ngokunjalo ngikhuthaza uzulu ukuthi awabonge kakhulu amaqhawe akuleli ngoba kungayisiwo ngabe kasilakuthula kuleli.

“Amaqhawe esiwabongayo akukhathalekile ukuthi ngaphilayo kumbe ngafayo ngoba wonke enza umsebenzi ofanayo owokuletha ukuthula kuleli. Yebo kambe akhona amaqhawe atshonayo ngesikhathi sempi angamboni uzibuse lo ayemlwela kodwa umsebenzi wawo awenzayo uqakathekile kakhulu, siyawubonga ngoba ancedisa ukuthi sithole uzibuse,” kutsho uKhmrd Dube.

UKhmrd Dube uqhubekele phambili wathi amanye amaqhawe la afela egangeni angabonwa muntu kuthi amanye asasekhona kuleli ngakho kufanele abongwe kakhulu ngoba yiwo aletha intuthuko kuleli.

“Kukhona amaqhawe akuleli alwa impi yenkululeko afela egangeni okungaziwayo ukuthi kungaphi, kube khona njalo amanye amaqhawe afela endaweni ezaziwayo ngakho amangcwaba awo kufanele anakekelwe ngoba amaqhawe la enza umsebenzi omkhulu kakhulu. Ngikhuluma nje sesileminyaka engu-37 sathola uzibuse, okuchaza ukuthi sileminyaka emilutshwana kakhulu ukuthi silibale imbali yethu kungakho kubalulekile ukuthi singakhohlwa imbali yesizwe sethu.

“Okunye njalo ngibonga amaqhawe la asaphila ayiwo asigcinele ukuthula kuleli. Ngalokhu kungayisiwo ngabe ilizwe lethu kalilantuthuko.

“Ngitsho ngoba umnotho wonke okuleli ugcinwe ngamabutho esilawo kuleli. Lokhu kuveza sobala ukuthi kungayisiwo ngabe akulantuthuko kuleli. Okunye njalo kufanele sifundise abantwabethu ngokuqakatheka kwembali yesizwe ukuze ingatshabalali ngoba yiyo elobuzwe bethu,” kuphetha uKhmrd Dube.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds