uMthunywa
Nomthandazo Ndlovu
ZISELE zimangele izakhamizi zeShangani ngemva kokuba enye indoda itshise intombi yayo nge-paraffin yafa ngemva kokuyifica lenye indoda embhedeni wabo.
Isiga lesi esihlasimulisa umzimba senzakale ngeviki ephelileyo lapho uTenson okungasatholakalanga isibongo sakhe leminyaka yakhe yokuzalwa afika endlini ehlala intombi yakhe, uMolet Mpofu ebusuku ngemva kokuzwa ihungahunga lokuthi usezwana lomunye ujaha.
Ekhuluma loMthunywa uMnumzana Melusi Siziba oyisakhamuzi sakule indawo uthe kuyethusa njalo kubuhlungu lokhu okwenziwe nguTenson loba nje kungamangalisi ngoba uyaziwa ukuthi yisigebenga ngoba wake wagamula omunye umuntu ngebhemba.
“Thina besihlezi nje sikwejisile sezwa ngomuntu esehlaba umkhosi sithe sifika sathola uMpofu sebemlumathise umlilo eceleni kwakhe kulesigubhu se-paraffin khonapho kodwa ujaha abelaye wenelisa ukubaleka ebona ukuthi sokunzima,” kuchaza uMnu Siziba.
Kubikwa umuyi uMpofu ebona izakhamizi sezigcwele zizama ukubamba uTenson wahle wazama ukubaleka ukuze athole usizo.
“UMolet uthe ebona izakhamizi zizama ukubamba uTenson laye wahle wathi nyawo ngibeletha esiya kumngane wakhe uDalubuhle Sibanda onguye owamhambisa esibhedlela kanye lezinye izakhamizi,” kuqhuba uMnu Siziba.
UMthunywa uzwe ukuthi loba izakhamizi zazama ngamandla onke ukubamba uTenson kwehlula ngoba wasibathela wadla phansi njalo lokhu kungaziwa ukuthi ungaphi.
Kubikwa uMpofu wabhubha ngemva kwensuku ezimbalwa esibhedlela seShangani lapho ayelaliswe khona.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile ukuthi lwenzakele.
“Liqiniso ukuthi kulomfana otshise intombi yakhe nge-paraffin eShangani ngeviki edluleyo njalo sisaphenyisisa ngodaba lolu,” kuphetha uInsp Ndebele.
