uMthunywa
YiNtatheli kaMthunywa
ABADLALI benguqu abasacathula kuleli bazathola uncedo lwaphezulu nanko inhlanganiso ephethe lumdlalo iFifa ibika ukuba isilohlelo lokubhadalela abadlali indleko zesikolo.
Uhlelo lolu luqinisa isithembiso esaphawulwa yiFifa ibika ngoZibandlela ukuba izancedisa abantwana abalethalenta abaleminyaka yokuzalwa engaphansi kwetshumi lanhlanu.
Umbiko lo usukhweze amadlabuzane kubadlali abangamatshumi amathathu asebekhethwe kuqembu elizadlalela isabelo sakoBulawayo kumqhudelwano wokudinga abadlali abazangena kuqembu lesizwe kulabo abaleminyaka engaphansi kwe-15 yokuzalwa.
Imidlalo le edibanisa izabelo zonke kubikwa isekelwa ngakho konke esikhwameni senhlanganiso yeFIFA.
Ebikela iphephandaba likazulu ngokubunjwa kweqembu labafana bakoNtuthu, uMkhululi Mthunzi olilunga lebhodi yeZimbabwe Football Association (Zifa) ebona ngengqubekela phambili, uthe iqula elikhethe abadlali libalisa osaziwayo kunguqu lengitshi zomdlalo eziphuma kuziqinti eziyisithupha koBulawayo.
Ingcitshi ezikhethe iqembu kubikwa zikhokhelwa nguDumaza Dube, uAli ‘Baba’ Dube loGibson Homela.
UMthunzi uthe kungumbono wabo ukuthi ingcitshi lezo zikhethe abafana abalethuba elihle lokuthi bazibonakalise nxa bencintisa lezinye izabelo.
“Ingcitshi eziphiwe umlandu wokukhetha abadlali abazadlalela isabelo sakoBulawayo zibhode kuzigodi zonke ezikulesi isabelo zakhetha abadlali ababumbe leliqembu. Umsebenzi owenziweyo uyancomeka njalo silethemba elikhulu ukuthi abadlali laba bazangena ngobunengi babo kuthimu yama-Under 15 esizwe,” kutsho uMthunzi.
Kubikwa emdlalweni yezabelo le, ingcitshi ezitshiyeneyo zizahlala phansi zihlaziye ithalenta ukuze ziphume labadlali bohlonzi abazalolongwa ukuthi badlalele iZimbabwe kumincintiswano yeFifa kwelizayo.
“Ngemva kwemidlalo yonke, kuzakhethwa njalo abadlali abazaphiwa ithuba lokudlalela iqembu lama-Under 15 esizwe. Kukhangelelwe ukuthi iqembu leli ligcinwe lihlangene okweminyaka eyisithupha ezayo. Lokhu kwenzelwa ukuthi isizwe sibeleqembu labadlali abazanayo, asebedlale bebonke okweminyaka eminengi kusiyafika umnyaka ka2022.
