uMthunywa
YiNtatheli kaMthynywa
AMAZWE amane anxuswe ukuba adibane kumdlalo wekhilikithi wokuncintisela inkezo ye-Old Mutual Heath Streak Africa Cup oqala kulimpelaviki enkundleni zekolitshi leHeath Streak Academy koBulawayo.
Umbiko ovela kunhlanganiso eqhuba lumncintiswano osekelwa ngumqeqetshi weqembu lesizwe elamaChevron uHeath Streak, ubike ukuba kusukela mhlaka 12 kusiyafika mhlaka 15 kulinyanga amaqembu eZimbabwe, Botswana, Namibia leZambia azadlalela ukuba zintshantshu zalinkezo. Abadlali bamazwe la kubikwa kumele babeleminyaka yokuzalwa engaphansi kwe-14 kulumncintiswano we-T20.
“Umncintiswano wethu we-Old Mutual Heath Streak Africa Cup usuphendukile. Uzaqala mhlaka 12 kusiya ku-15 Ncwabakazi eHeath Streak Academy. Lonyaka kuzancintisa amaqembu amane abalisa iEcobank Namibia, Choppies Botswana, iZimbabwe lePepsi Zambia.
“Injongo yethu ngeyokukhulisa ithalenta lomdlalo wekhilikithi kwabasakhulayo eAfrica,” kutsho umbiko ophuma kwabe-Heath Streak Academy.
Iqembu leZimbabwe yilo intshantshu yehlandla lakuqala lenkezo kulandela ukunqoba kwalo iSouth Africa. IZimbabwe idlala ngaphansi kwebizo elithi Fazak Zimbabwe ngenxa yokuthi isekelwa yinkampani yeFazak Africa etholakala koBulawayo.
Umaqhuzu weHeath Streak Academy uJoseph Rego ubike ukuba balombono wokuqhuba umncintiswano wenkezo yabo belandela uhlelo lweligi yekhilikithi yase-India edume ngokuthi yiIPL
Inkezo le iqhutshwa okwesibili lokhe yasungulwa ngomnyaka ka-2015 lapho okwanqoba khona iqembu leFazaka Zimbabwe ngemva kokudla isizwe se-South Africa.
Umaneja omkhulu oweFazak Africa uZak Hawa ubikele iphephandaba likazulu ukuba ibhizimusi labo lizaqhubeka benikeza abadlali beqembu lakuleli usizo lonke abalufunayo.
Abanqobi balinkezo lonyaka bazadlala komunye umdlalo we-T20 leqembu elitshisayo elizaqoqwa kubadlali abangamatshumi amabili abahlala emalokitshini akoBulawayo befunda umdlalo kukolitshi likaHeath Streak.
