uMthunywa
Cornelius Luphahla
KUQUPHUKE uqethu kwaba luthuli esiqintini sakoGala ePlumtree lapho obekudibene khona amaqembu atshiyeneyo kumkhosi wezamasiko weTiBaKalanga Festival.
Umkhosi lo uqhutshwe ngoMgqibelo langeSonto kuviki ephelileyo.
Amaqembu abedibene eTiBaKalanga Festival abalisa iLupane State Drama Club, Intombi Zosiko, Inqama Elophondo, iMatshinge Dance Group, iTedzani and Malayangwa kanye lamanye amaqembu ezokujabulisa uzulu.
UMthunywa uvakatshele kule indawo wakhulumisana lomhleli walo umkhosi uFelix Silundika wathi uyabonga kakhulu umsebenzi owenziwe yileliqembu wabuya wancoma lamanye amaqembu abekhona.
“Mina ngibonga kakhulu umsebenzi owenziwe ngamaqembu wonke abekhona emkhosini lo ngoba muhle kakhulu.
Ngalokhu ngithi kawaqhubekele phambili esekela umkhosi wethu lo ukuze sithuthukise ezamasiko.
“Ngokunjalo umkhosi lo uzahlala usenziwa minyaka yonke njalo ngesikhathi esifanayo ukuze sivuselele amasiko akithi njalo siphakamise abaculi bakuleli,” kutsho uSilundika.
Ekhuluma lentatheli uNkululeko Sibanda ongumholi weqembu leLupane uthe bazaqhubeka ngomsebenzi wabo bejabulisa uzulu.
“Thina njengeqembu sizaqhubekela phambili ngomsebenzi wethu wokujabulisa uzulu njalo siyathembisa ukuthi sizaqhubeka siphathisa ekuthuthukiseni amasiko akithi,” kutsho uSibanda.
UManager Sibanda ongumholi weqembu leNqama Elophondo uthe ubonga uzulu ngokuphatheka emkhosini lo wokuthuthukisa ezamasiko.
“Mina ngibonga kakhulu uzulu ngokuphatheka emkhosini lo ophakamisa ezamasiko kanye labaculi. Ngalokhu ngithi uzulu aqhubekele phambili ngokusisekela lathi sizahlala simjabulisa ngengoma zethu,” kuphetha uSibanda.
