uMthunywa
Kingstone Mapupu
KULENDODA yeGuruve, esabelweni seMashonaland Central, ehlala kuUnit N eChitungwiza, elohlupho lwayo yodwa nanko phela ithi iyangena esikhathini njengabesifazane.
Ngaphandle kwalokho, indoda le ithi nxa ichitha amanzi kuphuma izibungu eziphilayo ezibalisa izinhlwa, amagenga, ubunyonyo kanye lamawemusi.
UJoseph Mwale (40) uthe uselenyanga ephakathi kwamalangabi la.
Uthe unkosikazi wakhe uSheillah Mahari (33), nguye owamlungisayo ngoba wayethanda abafazi.
“Ngiyopha kakhulu ngesitho sami sangasese, kwezinye izikhathi igazi lakhona liyagcwala imbodlela yekhokhokhola encinyane. Phezulu kwalokho ngiyaphuma ubunyonyo obehlukeneyo, izinhlwa, amagenga kanye lamawemusi nxa ngichitha. Izibungwana lezi ziyabe zinabuzela nxa ngiqeda kuchitha,” nguMwale lowo, etshengisa intatheli zeKwayedza isitho sakhe esasiphuma igazi.
UMnu Mwale uthe umzimba wakhe usucikizeka ngenxa yokuhlala esopha.
“Ngiqalisa ukopha ngangilenhloni ukuthi ngazise umkami ngakho kodwa ngemva kwensuku ezimbalwa ngamtshela ngasengimtshengisa igazi liphuma yena wenza angathi uyamangala eqamba amanga,” kutsho uMwale.
Indoda le iveze ukuthi unkosikazi wayo isihlale laye okweminyaka engu-15 njalo balabantwana abane bonke.
Uthe esebikele umkakhe bavakatshela uyisemkhulu ukuze athole uncedo.
“Ngathi ngitshele umkami wathi siye kuyisemkhulu lami ngavuma njengomuntu owayedinga uncedo. Mina ngangisithi siya kuyisemkhulu eKuwadzana kodwa wangihambisa kwenye indawo engingayaziyo.
“Wafika wangena lami kwenye indlu yenyanga wasengichazela ukuthi yikho lapho angilungisisa khona.”
UMwale uqhubekele phambili esithi: “UKhulu oyinyanga lo wavuma ukuthi nguye owangilungisayo wathi umkami wafika kuye amahlandla amabili ekhala esithi udinga uncedo sekhathele ngokungathembeki kwami.”
UMwale uthe wayengayiwa ezigqokweni kodwa sewatshiyana lakho.
“Ukhulu wathi kumele ngicele uxolo kumkami njalo ngehlukane lokuthanda abafazi njalo lokhu sengakwekela. Umkami wabikela abafowabo ngokungathembeki kwami bathi kumele ngimxolise ngenkomo, inkomo le ngizamnika ngekhefu likaNcwabakazi singaya ekhaya,” kutsho uMwale.
Khathesi uMwale uhlala efake ama-tissue, utshinda kumbe amalembu esithweni sakhe ngenhloso yokuthi angazingcolisi ngegazi eliyabe liphuma.
Intatheli le ihlubulelwe ibhulugwe nguMwale yazibonela ngawayo amehlo.
“Igazi leli nxa liphuma lingagcwala empahleni zami zaphakathi njalo kuyenzeka liphumele phandle. Kunjenje kangisahlohli leyembe ngoba ngisenzela ukuthi abantu bangaboni isimo sami.”
“Umkami angimsoli ngalokhu angenza khona, luthando lobukhwele ngoba lami ebafazini bengingayiwa.
“Ngomnyaka ka2010 lo2013 ngalobola amakhosikazi amabili kodwa unkosikazi wami omdala wayekhona,” kuveza uMwale.
Uthe ngenxa yokuthanda abafazi wake walwa lomkakhe okwabangela ukuthi amtshaye ngembodlela elihlweni lesandleni sokudla njalo wamtshisa ngelambazi esiswini.
“Khathesi lanxa sengincediswa ngiyatshintsha utshinda kahlanu ngelanga. Inkuthazo yami kwamanye amadoda yikuthi asiqapheleni ngoba abanye abesifazane bayalimaza. Nxa siphuma sisiya emsebenzini bona bayabe besiya ezinyangeni kanye lakubaphurofethi.
Indoda le engumbazi iveze ukuthi isisehluleka ukusebenzela imuli yayo ngenxa yesifo lesi.
“Olunye uhlupho engilalo yikuthi isisu sami siba buhlungu kakhulu. Umzimba wami lawo uyaluma, okwenza ngize ngizilimaze ngisenwaya. Lanxa konke lokhu kusenzakala empilweni yami, umkami ngiyamthanda ngeke ngimxotshe,” kutsho uMwale.
