uMthunywa
KULEZINSUKU bathi ubunandi uyazenzela nanko kugcwaliseka njalo ngephephandaba likazulu eselihlala lipheka ezimnandi kuphela. Angithi kule iviki lize levithikazi lentombi elingena kunyakaze uzulu kwezemidlalo.
Lelitshatshazi nguQueen Ndlovu intombi edabuka eNkayi kuthi kwezemidlalo idume ngokuthi nguSandile. Kayidlali nje lintombi ilomuntu phansi. Othanda ukujabula kule iviki ungakhutheki nansi ingxoxo ehlabusayo phakathi kwetshatshazi leli uQueen Ndlovu (QN) lentatheli yephephandaba likazulu uCornelius Luphahla (CL).
CL: Tshatshazi lodumo akutsho ukuthi waqalisa kutheni ukuba ngumdlali wobulingisi?
QN: Ukuba ngumdlali wobulingisi ngakuqalisa ngesikhathi ngisafunda ngemva kokuba ngibhujelwe ngabazali bami ngisase-primary. Ngaqhubeka lakho ngaze ngayafunda eHompane Secondary School. Ekukhuleni kwami ngangingumdlali wobulingisi noma nje ngangingakaziwa ngokugcweleyo.
Okwenza ngaqhubekela phambili ngobulingisi yikuthi ngathi ngifika kweleSouth Africa ngahlangana loSibonokuhle Moyo ongumlobi wengwalo lemidlalo wasengingenisa kwezemidlalo.
CL: Wagqugquzelwa ngubani uze uphakame kwezemidlalo?
QN: Kwezemidlalo ngakhuthazwa nguVictress Mathuthu ongumholi wenhlanganiso yamanina ethiwa yiThe Zim Imbokodo ngemva kokuba ngiphatheke ngaba lilunga lale inhlanganiso. Nguye-ke owangikhuthaza ukuthi ngiqhubekele phambili ngilingisa.
CL: Wandise ukudlalela ngaphi njengomlingisi njalo yiliphi iqembu osebenza lalo?
QN: Ngivame ukudlalela kweleSouth Africa ngoba ngihlala khona kodwa ngisebenza ngaphansi kweqembu leBMK Production eliholwa nguChris Mvalela loSibonokuhle Mvalela Moyo. Kuleliqembu ngidlale emdlalweni esiwukhiphe kumnyaka ophelileyo olesihloko esithi, Isililo Senkedama lapho engidlale nginguSandile ngiveza ububi bokulahlwa kwabantwana ngoyise.
Ngalokhu ngisaqhubekela phambili ngomsebenzi wami noma nje kwamanye amaqembu ngingakasebenzi ngendlela ephakemeyo.
CL: Abantu bathini ntombenhle ngomsebenzi wakho njalo ukhangelele ukubenzelani njengomdlali wobulingisi?
QN: Abantu bayawuthakazelela kakhulu umsebenzi wami njalo bangikhuthaza ukuthi ngiqhubekele phambili ngawo ngoba ngibadlalela kamnandi. Ngalokhu ngibathembisa ukuqhubeka ngibenzela okuhle ngithi kabalindele ezimnandi njalo emdlalweni wethu njengeqembu le BMK Production omutsha esisawupheka osuseduze ukuphuma.
CL: Bunzima bani oyake uhlangane labo kwezemidlalo njalo nkuthazo bani oyipha abadlali kanye labaculi abasasungula?
QN: Ubunzima engiyake ngihlangane labo kwezemidlalo yikuthi umsebenzi lo kawuniki imali enengi ngakho udinga ukubekezela. Ngalokhu kubadlali abasasungula ngithi kababambelele noma kunzima njalo bengadlaleli ukuthola imali kakhulu ngoba bengajonga imali bazadela njengoba ingekho nengi emsebenzini lo.
Okunye njalo ngibakhuthaza ukuthi kabaphatheke ekubeni ngabadlali ngenhloso yokuveza iziphiwo zabo kanye lokujabulisa uzulu hatshi ukujonga kakhulu imali.
