uMthunywa
YiNtatheli KaMthunywa
SASISAZI ukuthi uMutuma ngumthengisi!
NgoLwesibili uRoderick Mutuma ukhethe ukutshiyana leHighlanders wasayina isivumelwano loProphet Walter Magaya kuYadah Stars FC.
Inyathelo lalumfana livuse ulaka lwabalandeli beTshilamoya ababike ukuthi isenzo sakhe sibatshile umoya, ikanti abanye bathe babesazi ukuthi umdlali lo kasoke aqede isizini egqoka ezimnyama.
Ekuphumeni kodaba lokufulathela kukaMutuma, iphephandaba likazulu lixhumane labasekeli bethimu abaveze ukuthi bacunukile ngalumdlali.
Abanye bathe kabalandaba lokuhamba kwakwe kukanti abanye basole iqula le-executive, ikakhulu umgcinisikhwama uDonald Ndebele.
“Sibuhlungu ngokuhamba kukaMutuma. Umfana lo ubuye kuBosso simthanda, sikhangelele ukuthi ahlohle. Yini manje nxa esehamba? Abadala be-executive bavoxe udaka lapha. Kungani uDonald Ndebele engakhiphi imali?
“Kungani bavuma ukuthi abadlali beze eqenjini besazi ukuthi akulamali? Yisitsotsi lesi. Badlala ngethimu kaMzilikazi,” kukhala uNdumiso Dlangamandla oseMakokoba koBulawayo.
UWilfred Nyamande osekela iBosso eseFilabusi uthe ukusuka kukaMutuma kuyisifundo.
“Wenze kahle wahamba ngoba usevulele abafana abancinyane ithuba. Kodwa singakhohlwa ukuthi kulephutha elenziweyo. Umdlali lo bekumele avinjwe ngenxa yokuthi isizatho sakhe sokusuka ngesemali. Pho iBosso ibisehlulwa yini ukubhadala umdlali oqhutshelwe ukuhlohla? Asizinukeni amakhwapha, sizathola ukuthi kukhona okungayisikho emzini wethu.”
Kulehlekana labalandeli balithimu abathe uMutuma uthengisile. Umsekeli owaziwayo koBulawayo uTeekay ukhuze “abadala” ukuthi bafunde ukujulisisa ingqondo anduba basayine abadlali.
“Mina uMutuma bengimthanda. Ngangifisa sibili ukuthi ahlohle amabhola. Ekuqaleni ngangimzonda kodwa ngananzelela ukuthi laye uyayithanda iBosso. Lokhu akwenzileyo akuqali ngaye, bakhona abathengisa iqembu kudala abafana loMasimba Mambare loValentine Ndaba.
“Bonke laba abenzanga lutho. Abakufunayo yimali yeBosso, iqembu abalandaba lalo ngitsho. Ngithemba abadala bethimu bakubonile khathesi. Sekumele kuphela ukudonselana umbono nxa sidinga abadlali,” kutsho uTeekay.
Ngokuza kwakhe kuqembu, uMutuma unikezwe amabizo okudlala. Usebizwa ngokuthi “Mntungwa”, “Nkosana”, abanye njalo bathi ngu“Mthunywa”.
Umaneja kaMutuma uCarlos Tavengwa wazise abalandeli beHighlanders ukuthi uzamile ukuncenga umdlali wakhe kodwa kwehlula.
