uMthunywa
UBUYELE ejimu yeqembu leLamontville Golden Arrows uKudakwashe Mahachi ngokuvela ukuba umqeqetshi weMamelodi Sundowns akamdingi kulisizini.
Umdlali lo ngowe-Mamelodi Sundowns kodwa kazange athole ithuba elinengi lokuthi azitshengisele kuleliqembu.
Wabolekiswa kuArrows ngesizini edluleyo, wayisiza yaqeda endaweni yesikhombisa ku-logu ye-Absa Premiership.
UMahachi akaze ayithole indawo engeyakhe eqenjini leSundowns ngaphansi komqeqetshi uPitso Mosimane kusukela asayina isivumelwano seminyaka emihlanu ngo-2014 kuleliqembu, esuka kuBantu Rovers.
Ungomunye wabadlali beSundowns abaphila ngokwebolekwa emaqenjini ePremiership.
Umaneja kaMahachi, uMike Makaab, uthe umdlali lo uzabuyela kuSundowns njengabo bonke abadlali bayo abasuke bephuma ekubolekisweni.
Iphephandaba leSolezwe lithole udletshana lokuba uMosimane akayizwa kahle ekaMahachi obekukhangelelwe ukuthi uzavala isikhala esivuleke ngemva kokuhamba kukaKeagan Dolly osedlala eFrance.
Umsekeli kamqeqetshi we-Arrows, uMandla Ncikazi, uthe uMahachi usebuyile kuBafana Bes’thende.
“UMahachi ubuyelile kuSundowns njengoba besimbolekile. Ingxoxo zokuthi adlale kithi ngesizini ezayo ziyaqhubeka kodwa uzabe eqeqetsha lathi ngoba sikhathazwa yikuthi kuSundowns kajimi leqembu. Silethemba lokuthi kuzaqedwa konke acine elapha kithi.” Ngaphandle kukaMahachi, i-Arrows kusafanele ithole loKnox Mutizwa ebimboleke kuBidvest Wits. UMutizwa, ongumgadli wamaWarriors, uqede isizini le ngesitayila kulandela ukudlala kuhle kumqhudelwano weCosafa Castle Cup lapho aphiwe isicoco sokuba ngumdlali odlule bonke.
“Bakhona abadlali esibakhangeleyo. Siyadinga ukuqinisa phambili. Ababukeli bemidlalo yethu bazakhumbula ukuthi uMutizwa besikade simbolekile kuWits. Siyaxoxisana lalo leliqembu ukuthi simthole umdlali wethu. Kodwa ngilethemba lokuthi uzabuya,” kutsho uNcikazi. — Ubulembu
