uMthunywa
Umkami uthandana lomngane wami
NGINGOWESIFAZANE oleminyaka yokuzalwa engu-25. Ngileminyaka eyisikhombisa ngendile. Umkami waqala ukutshintsha ngemva kokuthola umntwana wokuqala. Waze wajola lomngane wami. Inkinga yikuthi ulokhu eqhubeka ejola laye noma sengamtshela ukuthi kuyangihlukuluza. Umngane wami uthi sebehlukana kodwa umkami nguye olokhu emdinga. Ngenzenjani?
Impendulo:
Akukuhle okwenziwa ngumkakho kodwa qaphela lomngane wakho. Kutsho yena kathembekanga kuwe. Noma ngabe sebehlukene kodwa kumele ukhangelisise ubungane benu. Umtshado udinga umuntu owaziyo ukuthi utshadelani.
Ayikho into ebuhlungu njengomuntu ozakuthatha kodwa abe eseqhubeka ngempilo yakhe eceleni. Thola isiqiniseko kumngane sokuthi ngumkakho osaqhubeka emlandela. Kumele ujabule emtshadweni kodwa nxa umkakho engakuhloniphi ngeke ujabule. Hlala phansi labakwenuzala kanye lomkakho likhulume ngale indaba.
Kafuni ngiyevela
NGIYINDODA eleminyaka engu-30, ngilonkosikazi engihlala laye kodwa kangaziwa ngakibo. Uhlupho engilalo yikuthi Khulu ngingathi ngifuna ukuyavela ngakibo uyangibuza ukuthi ngilemalini abesesithi incinyane kakhulu leyomali. Ngenzeni Khulu? Kunzima ukugcina imali, mina bengifisa ukuthi ngihambise leyo engilayo ngibe sengibuyela ngingathola enye. Ngicebisa Khulu ngoba kangifuni ukuthi ngihlale lomuntu ngingaziwa ngakibo.
Impendulo
Ukuhlala lomntanomuntu ungaziwa ngakibo yikumumatha inkalakatha yengozi enzima kakhulu, kuyabe kulefu, elimnyama elizulazulayo phezulu ekhanda nje mzukulu ngoba, lomuntu ohlezi laye engagula uzambika ngaphi njalo kobani futhi ufike uthi wena ungubani wangaphi njalo otheni. Isintu siyakuveza ukuba umkhwenyana yinxoza nje, kungakho kutsho ukuba ukukhupha imali kwabozala akupheli. Kungakho-ke, kuhle ukuba ukhulume lezihlobo zakhe eziseduze okungaba ngodadewabo kumbe obabakazi ubabonise ukuba wena uphetheni njalo ufuna ukuyaziveza kwabo. Khulumisanani uhambise lokhu okuphetheyo ngoba awuyithenga kodwa uyacela ubuhlobo.
Sengithanda ubabazala kulomkami
NGINGOWESIFAZANE oleminyaka engu-32, ngileminyaka emine ngishadile. Angihlali lomkami ngenxa yokuthi usebenza eGoli, ubuya ekupheleni kwenyanga. Ngihlala labantwana lobabazala, umamazala sewabhubha. Inkinga yikuthi sengithandana lobabazala. Ngaqala ngingafuni kodwa ngaze ngawela.Sizama ngayo yonke indlela ukufihlela umkami labantwana. Sengithanda ubaba kakhulu kulomkami futhi sengikhulelwe umntanakhe. Ngenzenjani?
Impendulo:
Ukuphuma kwendaba le kuzamhlukumeza umkakho kodwa lokho kungcono kulokuphila impilo yamanga. Kubi kakhulu okwenzileyo. Bekungamelanga uthandane lobaba lomntwana ngoba usudale ukulwa phakathi kwabo.
Kwakumele uzame ngayo yonke indlela ukwenqabela ukuthi lokhu kwenzakale. Wawumele umtshele lokuthi uzakwazisa indodana yakhe nxa angaqhubeka ekukhombisa. Lokhu kuzakuba yisilonda esikhulu phakathi kwendodana loyise futhi kuzathatha isikhathi eside ukuthi kudlule. Kuzakuba nzima ukuthi umkakho akuthembe kodwa akukho okudlula uthando. Phumela egcekeni utshele umkakho iqiniso. Tshiyana loyihlozala, wakhe umuzi wakho.
