uMthunywa
Cornelius Luphahla
ZIDIDEKILE izakhamizi zesigabeni seMalibobo eBinga ngemva kokuba amadoda amane akule indawo egula okucatshangelwa ukuthi abulawa yilunyoka aluthatha kwelinye inina lakule indawo.
UNkosazana Luyando Dube kucatshangelwa ukuthi wafakwa ulunyoka ngumkakhe uMnumzana Caleb Donga ngesikhathi bengakehlukani okucatshangelwa ukuthi yikho osekugulisa omasihlalisane bakhe abane abahlala kule indawo.
UMthunywa uxhumane loNkosazana Girl Ncube oyisakhamuzi sakule indawo wathi abane laba okwenza kucatshangelwe ukuthi babulawa yilunyoka yikuthi yibo ababikela usobhuku lokhu.
“Kuthe kuviki ephelileyo uSobhuku uMudimba wasibiza edale lakhe ethi kulendaba ofuna ukusitshela yona. Ekubizweni lapha sasiyikhomithi yakhe kuphela kanye lalaba abagulayo. Okwangimangalisayo yikuthi bonke bobane bathi bazosibikela ukuthi babulawa yilunyoka abaluthelelwa nguMaDube.
“Lokhu kwasethusa kakhulu kodwa uMaDube wayengekho ngalesosikhathi ngakho usobhuku wathi kufanele siqale sikhulumisane laye simbuze kodwa sokuze kunamuhla kasikakhulumisani laye,” kutsho uNkszn Ncube.
Esinye isakhamuzi sakule indawo esiziveze ngokuthi nguMoyo uthe uNkszn Dube ulomnyaka owodwa wehlukana lomkakhe njalo kukhanya nguye owamfaka ulunyoka.
“UMaDube wehlukane lomkakhe kumnyaka ophelileyo ngemva kokuba kuzwakale ukuthi usethethe edolobheni leBinga lapho ahlala khona. Ngalokhu abantu bacabangela ukuthi watshiye efake umkakhe ulunyoka ngoba umkakhe nguye owathi akasamfuni njalo engasabuyi emzini wakhe.
“Okunye njalo abantu bonke athandana labo bayagula nxa besiya ebantwini kuthiwa balolunyoka ngakho kudingakala ukuthi uDonga abelaphe ngoba nguye owadala lokhu. Isimanga yikuthi khathesi akwaziwa ukuthi ungaphi njalo locingo lwakhe kalusangeni,” kutsho uMnu Moyo.
Ebuzwa ngale indaba uNkszn Dube uthe yena kakwazi ukuthi ulolunyoka njalo usobhuku kazange wamtshela.
“Mina kangikwazi ukuthi umkami wangifaka ulunyoka ngesikhathi singakehlukani njalo usobhuku kazange wangibuza ngakho. Okunye njalo abantu engizwana labo kabakangitsheli ngendaba enjalo,” kutsho uNkszn Dube.
Imizamo yokukhulumisana losobhuku wakule indawo uMnu Mudimba yehlule ngoba ucingo lwakhe lwalile ukungena.
