uMthunywa
Cornelius Luphahla
IQEMBU lomculo we-disco music elidabuka koBulawayo iParadise Queens seliqalisile ukupheka ividiyo ehlabekisayo ngemva kokukhipha kwalo idlalade.
Leliqembu laphuma ekhalweni leqembu leSisters of Paradise elicula ezokholo ngakho lisebenza lincedisana lalo kwezinye inhlelo ngenhloso yokujabulisa uzulu.
UMthunywa uxhumane loCathrine Wate othe sebeqalisile ukupheka ividiyo yedlalade labo abalikhiphe kumnyaka ophelileyo njalo bathembisa uzulu indaba ezimnandi.
“Sesiqalisile ukupheka ividiyo yedlalade lethu elithi Africa esilikhiphe kumnyaka ophelileyo. Lokhu sikwenza ngoba abantu bathi idlalade lethu limnandi kakhulu ngakho bafuna ividiyo. Ngalokhu sisazoqhubekela phambili ngomsebenzi wethu wokujabulisa uzulu kanye lokumbonga.
“Njengabasakhulayo sikhuthaza njalo intsha ukuthi iphakame iveze iziphiwo zayo emphakathini ukuze ithole usizo ngoba nxa ihlezi akekho ozayinakekela. Okunye njalo sibonga iqembu leSisters of Paradise okuyilo elisincedisa ngendleko ezifuneka ekuphekeni ividiyo yethu le,” kutsho uCathrine Wate.
Intatheli ikhulumisane loThembi Sibanda umholi weqembu leSisters of Paradise wathi okwenza basungula iqembu leParadise Queens yikuthi babefuna ukuveza iziphiwo zabatsha abaliholayo.
“Iqembu leli silisungule kumnyaka ophelileyo ngemva kokunanzelela ukuthi kulabantwana abancane esasicula labo abaleziphiwo ezinhle kwezomculo. Ngokunjalo sabona kungcono ukubaqalisela elabo iqembu lomculo we-disco ngoba kuyiwo abawuthandayo njalo abanelisa ukuwucula kanye lokugida.
“Iqembu leli liqukethe abantwana abancane kodwa litshengisa ukuthuthuka, labantu bayalithakazelela kakhulu. Ngalokhu ngibakhuthaza ukuthi bebambelele emculweni noma kunzima,” kuphetha uThembi Sibanda.
