uMthunywa
Nomthandazo Ndlovu
ABALIMI sebekhuthazwe ukuthi balungise iziphala lapho abazafaka khona isivuno sabo njengoba wonke umlimi eyitshayile inala ngemva kokuna kwezulu kakhulu.
UNkosikazi Connie Msipha ongumlimisi ukhuthaze abalimi ukuthi basesebenzise imithi ekumakethi ukuze bavikele umumbu wabo ungonakali uhlale isikhathi eside ulokhu ugcineke kuhle. Nxa kungela ndawo ehlelekileyo yokugcina lokuvikela isivuno abalimi bacina sebethengisa umumbu wabo masinya ngentengo ephansi umlimi abengayikhangelelanga njalo engayithandi.
“Kuqakathekile ukuthi umlimi asebenzise imithi ekumakethi enjenge Shumba Super Dust ukuze umumbu wakhe uhlale isikhathi eside ungonakalanga,” kutsho uNkkz Msipha.
Umumbu ugcineka kuhle nxa wonyiswe kuhle, nxa wonyiswe elangeni kuqakathekile ukuthi umlimi abe ewuphendulela ukuze wome ndawo yonke omunye ungasali umanzi.
Kungakafakwa imithi umumbu uyaqoqwa kuthi lowomumbu okhangeleka uke wangenwa yizinanakazana wehlukaniswe lalowo osaphilile, lokhu kwenzelwa ukuthi lokho okuphambanise omunye umumbu kungangeni kulowo osaphilile.
UNkkz Msipha uqhubekele phambili ekhuthaza abalimi ukuthi ngaphambi kokuba bafake umumbu esiphaleni kuqakathekile ukuthi bahlanze isiphala ukuze isivuno sihlale esiphaleni esihlanzekileyo njalo ungaphehlwa.
“Abalimi sibakhuthaza ukuthi bahlanze iziphala zabo bafake lomlotha womtswiri ukuze umumbu wabo ungaphehlwa,” kuchaza uNkkz Msipha.
Ubuhle bokuba lesiphala esihlanzekileyo kanye lokufaka imithi ehloliweyo njalo evunyelwe ngabezokulima yikuthi umlimi uyenelisa ukugcina umumbu wakhe okwesikhathi eside njalo awuthengise ngelanga afuna ngalo ngentengo ethe xaxa.
“Nxa umlimi efaka umuthi emunjini wakhe kuqakathekile ukuthi alandele isilinganiso esibhaliweyo ukuze umuthi usebenze njalo lesivuno sihlale isikhathi eside,” kuphetha uNkkz Msipha.
