uMthunywa
UKELVIN Kaindu ubika ukuthi uzatshengisa uErol Akbay ukuthi iHighlanders liqembu elinganqotshwa lula mhla zidibana kumdlalo weviki letshumi lanhlanu kumkhankaso weligi ephakemeyo eyeCastle Lager eMagumeni ngeSonto emini.
Amadoda womabili ahlangana enkundleni okwesibili kumdlalo weligi. IHow Mine ibukeka iliqembu eliqinileyo kuleHighlanders lonyaka. Abaqeqetshi laba akwaziwa ukuthi baphetheni kumqondo yabo yokuzama ukuphumelela kulumdlalo.
UKaindu oweHow Mine ubikele uMthunywa wathi akamesabi uErol labafana bakhe beHighlanders ngoba ulungiselele waphelela. UKaindu sewake waqeqetsha iBosso ngakho engaba lecebo lokuthi ayikhuphe ukuzethemba kwayo. Zingena kulumdlalo zivela nqoba kumidlalo yazo edluleyo. IHighlanders ibhaxabule iHwange 3-0, kwathi izimbamgodi zeHow Mine zaqinela abafana beYadah nge-2-1.
Imisila iphezulu kumaqembu la, okuyikhona okungenza umdlalo wazo uhlabuse. Ngokukhangelisisa isimo sabadlali kumaqembu womabili, iHow Mine ikhanya ilequla labadlali abangadinwa masinyane njalo abathanda ukudlalisa ibhola laphezulu. KuBosso inengi liyaphangisa ukuphuma kusimo somdlalo.
Ngesikhathi elolonga iqembu lakhe kwenye inkundla koBulawayo, uKaindu wazise uMthunywa ukuthi iHighlanders uyayihlonipha sibili. Uthe kasoke avumele ukuyihlonipha kwakhe kuphazamise ekukhuzeni abadlali bakhe mhla womdlalo.
“Umdlalo lo ngumdlalo omkhulu. Sidlala leqembu elihloniphekayo kunguqu yeZimbabwe. Ukulungiselela kwethu kuphambili ngoba siyazi ukubaluleka kokunqoba iHighlanders,” kutsho uKaindu.
Kungalane yeCastle Lager iHow Mine ihlezi kuhle kunombolo yesihlanu ilemklomelo engu-24. IHighlanders izihlalele kweyesine loba nje zilemklomelo elinganayo.
Ebuzwa ngombono wakhe, umqeqetshi weHighlanders uAkbay uthe kulumdlalo kuzabonakala ukuthi iBosso isiphendukile ngokunqoba.
“Iqembu engizalikhetha ngeSonto lizajabulisa abantu. Ngemva kokudlala kuhle sikhangelane leHwange, sengifuna ukudlalisa abafana abanqobayo abaletha impumela engcono.”
Kumpelaviki efanayo iChicken Inn idumelana leNgezi Platinum Stars iqembu eligiya phezulu kwengalane kusukela ngelanga lakuqala lesizini.
Ama-Gamecocks azakwazi ukuthi ukunqoba kwayo kuwaphosela phezulu kwengalane, ahle akhokhele okwakuqala ngo-2017.
Umqeqetshi uRahman Gumbo ubikele uMthunywa ecingweni wathi umdlalo uzagelezela kubo.
“Lo ngumdlalo okumele siwunqobe ngoba sifuna ukuyakhokhela ingalane. Sidlala kuhle kulezinsuku ngakho kumele siqhubeke,” kutsho lumqeqetshi osenqobe imidlalo emihlanu ilandelana.
Nansi imidlalo yeCastle Lager
kulimpelaviki:
NgoMgqibelo: Chicken Inn v Ngezi Platinum Stars (Luveve)
NgeSonto: H How Mine V highlanders v (Barbourfields), Bantu v Chapungu (Luveve), Triangle v ZPC Kariba (Nyamhunga), Hwange v Shabanie (Colliery), Black Rhinos v Harare City ( Morris Depot), Dynamos v Bulawayo City (National Sports Stadium)
