Ziyabheda kuNetball

22 Jun, 2017 - 02:06 0 Views
Ziyabheda kuNetball

uMthunywa

YiNtatheli kaMthunywa
IQEMBU lomdlalo wokuqaga lakuleli lilakho ukuthi lidilike, lehluleke ukuyancintisa kwele-Uganda ngenxa yokuswela imali lokudla.

Kubikwa amantombazana azadlalela isizwe kumncintiswano weAfrican Senior Women adliswa imbuya ngoluthi. Kulumncintiswano iZimbabwe izadlala leMalawi, Uganda, Botswana, Namibia leZambia kusukela mhlaka 24 kusiya ku-30 Nhlangula.

Kumbiko othunyelwe uMthunywa izolo uvela kuLetticia Chipandu umongameli weZimbabwe Netball Association (Zina), kubikwa iqembu lesizwe lidinga imali lempahla yokugqoka engaphathisa nxa sebencintisa kwele-Uganda.
Ithimu le yangena enkambeni kunyanga edluleyo kodwa indlala ibisibhahile njalo amalungiselelo eqembu leli ebekubanga elizwisa ubuhlungu.

Minyaka yonke inhlanganiso yeZina icela uncedo kodwa isikhalazo lesi sitshaya edwaleni. LoHulumende uyehluleka ukuzwa isililo samantombazana la.

Kulandela ukuphawula isikhalazo sabo kuhulumende lakumankampani, uChipandu uthe sebelethemba lokuthi uhambo lwabo lwe-Uganda luzaphumelela.

NgoLwesibili kubikwa abadlali bathunyelwe kudokotela wabo behlolwa umkhuhlane we-Yellow Fever, anduba baqhubekele phambili e-Uganda.

“Ithemba lokuthi sizahamba likhona. Khathesi ngikhuluma nje abadlali abalampahla eyaneleyo. Silungiselele nzima. Isikhalazo sethu ngesemali lokunye okubalulekileyo okuzanceda ukuthi sinqobe,” kutsho uChipandu.

Uthe balomthwalo onzima njengeziphathamandla ngenxa yokuthi isikhwama seZina asilamali.

“Kulamathimu amabili amantombazana okumele ayedlalela isizwe. Enkambeni sileqembu lama-Under 21 okumele liye eBotswana kumncintiswano wenkezo yomhlaba.”

Sekulesikhathi umdlalo wabodade ungakaze ubelemali esambeni sawo. Imali kulumdlalo ibonakala nxa kuthe kwaba lomqhudelwano obuthanisa amaqembu ezabelo kumbe uma umdlali ethe wakhethwa kuqembu lesizwe.

“Kukhanya amankampani akithi  kawafuni ukusekela umdlalo wethu. Iqiniso yikuthi ukuqaga akufuni mali enengi njengenguqu kodwa okuyimadlana kuyasiza ekuthini sihlale sincintisana siphakamise umdlalo, ” ngu Chipandu lo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds