uMthunywa
YiNtatheli kaMthunywa
KULENDODA engusiyazi ehlala esigabeni seSilozwi eMatopo ezitshaya isifuba ngokuthi iyenelisa ukwelapha yiloba wuphi umkhuhlane kugoqela igcikwane lengculazi, imvukuzane, umkhuhlane wetshukela leminye etshiyeneyo.
UMnumzana Mandla Nyathi ozibiza ngokuthi nguMalume uNyathi uthi igcikwane legculazi kalithathi mango ngoba uyenelisa ukulinyamalalisa emzimbeni womuntu.
UMthunywa ukhulumisane loMnu Nyathi wathi imithi le ayelapha ngayo uyayiphutshiswa njalo waqalisa eselapha abaphila lengculazi kuphela.
“Mina njengenyanga ngiyaphutshiswa imithi yokwelapha imikhuhlane etshiyeneyo. Ekuqaliseni ngaphutshiswa imithi yokwelapha ingculazi kuphela kodwa kuthe ngokuya kwesikhathi ngaphupha njalo eyokwelapha eminye imikhuhlane.
“Khathesi ngiyenelisa ukwelapha ufuba, imvukuzane yesibeletho, stroke, high blood pressure kanye leminye njalo imikhuhlane etshiyeneyo. Konke lokhu ngikwelapha kuphele emzimbeni womuntu kungakapheli inyanga eyodwa.
Kwabanye kuphela ngemva kwamaviki amabili kodwa ngibakhuthaza ukuthi baqhubeke benatha imithi yami kuze kwenele inyanga,” kutsho uMnu Nyathi.
UNyathi uqhubekele phambili wathi sowelapha abantu abanengi njalo ekwelapheni kwakhe uyakhulumisana labantu kusiya ngokuthi benelise ukumbonga ngani njalo uyasusa amadlozi amabi ebantwini.
“Lokhe ngaqalisa ukwelapha ingculazi sebebanengi engabelaphayo basuke lapho bayehlolwa kutholakale ukuthi abaselalo igcikwane lengculazi ngoba izihlahla zami ziyalibulala.
“Ekwelapheni lapha siyakhulumisana kusiya ngokuthi wenelise ukungibonga ngani. Kusenjalo labo abahlutshwa ngamadlozi amahle adinga ukulungiselwa ngiyenelisa ukuwahlalisa kuhle, kuthi labo abahlutshwa ngamadlozi amabi abachithela imizi abenzele okunye njalo okubi ngiyenelisa ukuwakhuza kusasemasinyane,” kutsho uMnu Nyathi.
Ekhuluma lentatheli uMnumzana Ndunduzo Mlilo omunye wabelatshwa ingculazi nguMnu Nyathi uthe yena wayengasenelisi lutho wathi ngemva kokwelatshwa ingculazi yaphela.
“Mina ngabuya ngivela kweleSouth Africa ngoNtulikazi 2015 ngingenelisi lutho ngenxa yengculazi. Ngahamba kuNyathi wafika wangipha imithi yakhe kwathi kusiyaphela inyanga ngasengiqinile sengisenelisa ukusebenza.
“Ngemva kwalokho wathi ngiyehlolwa ingculazi ngesaba kwaze kwathi ngoMfumfu ngayahlolwa ngathola ukuthi kangiselalo igcikwane lengculazi. Ngikhuluma nje lakhathesi kangilalo njalo kangisanathi ama ARVs,” kutsho uMnu Mlilo.
UMnumzana Nashe Malunga omunye wabelatshwa nguMnu Nyathi ehlutshwa ngamadlozi uthe yena uyabonga kakhulu ngomsebenzi amenzela wona.
“Mina ngangingatholi umsebenzi ngihlala ngiwubizelwa ngingawutholi ngiwuvalelwa ngamadlozi kanye logogo wami wayengenelisi ukuhamba kodwa sathi ngokwelatshwa nguNyathi mina sengisebenza logogo usesilile,” kutsho uMnu Malunga.
