uMthunywa
Gladmore Ncube
ABE-LIVESTOCK Production Development sebekhuthaze abalimi ukuthi bafuye inyosi ngoba zilondoloza imvelo ngoba kudingeka izihlahla ukuze zifuywe.
UMnumzana Cosmas Muzunde onguLivestock Production Officer esabelweni seMatabeleland North uthe ukufuya inyosi kuyindlela yokulondoloza imvelo njalo kulenzuzo enengi kubalimi.
“Nxa kufuywa inyosi zifuywa ezihlahleni. Lokhu kwenza imvelo ilondolozeke ngoba abalimi abazifuyayo bayakhuthazwa ukuthi bahlanyele izihlahla lapho inyosi zabo ezizafuywa khona emabhalwini.
“Lapho okulezihlahla ezinengi kulomoya ohlanzekileyo wokuphefumula, isizatho siyikuthi izihlahla zithatha umoya ongcolileyo zibe sezikhipha ohlanzekileyo oyiwo ophefumulwa ngabantu,” kutsho uMnu Muzunde.
Uthe inyosi ziyalondoloza imvelo ngoba umhlabathi uhlala ubambene awugugudeki njalo kawukhukhulwa lizulu ngoba impande zezihlahla ziyabe ziwubambile.
“Inyosi zidinga izihlahla ukuthi zihlale phakathi zenze uluju lwazo okwenza abalimi bahlanyele izihlahla ezinengi behlose ukufuya inyosi ezinengi. Lokhu kuyisenzo esiqakathekileyo kakhulu ekulondolozeleni imvelo. Kungakho abalimi bangafuya inyosi imvelo ayiphanjaniswa njalo iyalondolozwa,” kulandisa uMnu Muzunde.
Uqhubekele phambili walandisa wathi ukufuya inyosi kuyaphathisa abalimi kwezinye indawo.
“Indawo elezihlahla ezinengi ivunywa butshani. Izifuyo ziyathola amadlelo amahle kakhulu lapho okufuywa khona inyosi ngoba izihlahla ziba ngumthunzi wotshani okwenza utshani bukhule kakhulu njalo bungaphangisi ukutsha,” kutsho uMnu Muzunde.
UMnu Muzunde uphethe ngokuthi ukufuya inyosi kuqakathekile kakhulu ngoba kunika umlimi inzuzo ezitshiyeneyo lakuzifuyo azifuyileyo.
