uMthunywa
Thokozile Mbedzi
ABALIMI kuleli bakhuthazwa ukuba bafuye imvundla ngoba ilenzuzo enkulu.
Ekhuluma lentatheli kaMthunywa uHealth and Safety eZimbabwe Commercial Farmers’ Union, uNkosazana Ratidzo Dliwayo uthe abalimi kabafuye imvundla ngoba ilenzuzo enengi kubalimi ngoba konke okutholakala kuyo kuyathengiswa.
“Abalimi kumele bafuye imvundla ngoba konke okutholakala kuyo kuyathengiswa ngakho umlimi ubalenzuzo enkulu.
“Ukudla kwemvundla akuduli ngitsho ngoba lemibhida eluhlaza imvundla iyadla kanye lama-pellets ayiwo enza izale masinyane bazitholele inzuzo ngokuphangisa.
“Kodwa abalimi abangenelisiyo ukuthenga ama-pellets sibakhuthaza ukuba banike imvundla yabo imibhida eluhlaza njalo ehlanzekileyo ukuze imvundla ingahlaselwa yimikhuhlane etholakala ekudleni okungcolileyo,” kulandisa uNkszn Dliwayo.
“Okunye njalo okuqakathekileyo yikuthi abalimi babone ukuthi lapho abafaka khona imvundla yabo kuhlanzekile ngaso sonke isikhathi ukuze kungaqhamuki imikhuhlane mahlayana nje.
“Imvundla kayifuni kuhlaliswa endaweni engcolileyo kungakho abalimi sibakhuthaza ukuba ukuhlanzeka kuqakathekile.
Uqhubekele phambili njalo uNkszn Dliwayo ethi abalimi abafuna ukufundiswa ngokufuya imvundla bakhululekile ukuthi bazofundiswa emahofisini abo.
“Abalimi siyancedisana labo ngokubafundisa ngokufuya imvundla kanye lokuthola imikambo lapho abangathengisela khona imvundla yabo bathole inzuzo ephezulu,” kuphetha uNkszn Dliwayo.
