uMthunywa
Gladmore Ncube
BEKUYISIPHITHIPHITHI abantu belitshebetshebe likaShangani ePelandaba ngempelaviki kuthakazelelwa isibusiso sempilo ende kaGogo MaNgwenya osenelise iminyaka engu-103 esidla amabele.
Umcimbi kaGogo uLinah Ngwenya ubuthanise abantu abavela kumagumbi amane omhlubulo ongezansi yeAfrika elokitshini lePelandaba.
Izihlobo labangane bezihlangene kudliwa izibiliboco kunathwa lamanamunede kugujwa usuku lokuzalwa kwalintombi yakoNgwenya eyazalwa mhlaka 14 Nhlangula ngomnyaka ka1914.
UGogo uMaNgwenya usehamba ngodondolo, kukanti emehlweni usebonela eduze njalo endlebeni ulokhu esizwa lanxa nje eselibala ezinye izinto.
Omunye umzukulu kagogo uMaNgwenya uNkosikazi Promise Khumalo uthe abomdeni banakane ukwenza idili leli ukuze babonge uMdali ngesipho sempilo ende esiphiwe ugogo.
“Sikhethe ukuthi senze lumsebenzi sibize imuli yonke labangane ukuthi bezojabula lathi lapha komalume uMbayiwa ePelandaba sithokozela impilo ende esiphilwe ngugogo.
“Ugogo wangondla ngisese lusane lamuhla sengilemuli yami kodwa lokhe ephila ngalokho kuhle ukuthi enzelwe into enhle efana ledili kuyikubonga konke okuhle asenzela khona ensukwini zakhe zobutsha,” kutsho uNkkz Khumalo.
ULinah Ngwenya wazalelwa eMpandeni, ePlumtree ezalwa nguZwabamwe Ngwenya owayenguyise loMacansi Dube unina.
UGogo MaNgwenya yena licinathunjana bebane emulini njalo nguye yedwa osesele.
UMaNgwenya wendela kuZwamuno Moyo ngo1945 bayakwakhela eCrossroads eMakorokoro babusiswa ngabantwana abangu-8 kodwa lamhla usele labahlanu njalo ulabazukulu abangu-44 lezizukulwane ezingu-82.
Ebuzwa ukuthi kuyini abona kuyikho okumenze waphila impilo ende uthe yena wakhula esidla ukudla kwesintu.
“Thina sakhula sisidla idobi esasilenza ngenkelo zentanga zomgoma lomganu, sikudla sihlanganisa lemibhida yendumba. Sasithiya omvundla sifaka imjibila sithola isitshebo. Sikhula kwakudliwa amabele, yiwo amabele angiqinisayo ngakhula ngaze ngaba ngaka,” kutsho uGogo MaNgwenya.
UGogo MaNgwenya uthe lanxa babenatha utshwala babenatha obenziwa ngamabele.
“Endulo sasipheka utshwala ngamabele sibunathe nxa silemisebenzi yesintu kumbe sizithokozisa. Aluba kuya ngami ngabe abantu banatha utshwala besintu ngoba buyaqinisa umzimba batshiyane lobesilungu,” kutsho uGogo MaNgwenya.
Omunye umzukulu kagogo, uBigboy Thulani Ncube ubonge indlela ugogo abakhulisa ngayo ethi yikho okwabenza baba yilokhu abayikho khona khathesi.
“Ngakhula ngihlala logogo njalo wayesifundisa okunengi empilweni. Lanxa bekhona abasitshiyayo kodwa ugogo wenza umsebenzi omuhle empilweni zethu,” kutsho uMnu Ncube.
