uMthunywa
BAKAMALANDELA kule iviki iphephandaba likazulu lize lazo njalo indaba ezihlabusayo njengoba beyitshaya ekhaleni oNdukuzibomvu amajaha omkhonto nxa babethi igula elidala livame ukunuka amasi. Kunjalo-ke lakuphephandaba nanko phela kalideli ukujabulisa uzulu mihla yonke.
Lamhlanje liphethe itshatshazi lentombi elingena kunyakazele kwezemidlalo. Intombi le nguNondulo Ngwenya odabuka kuleli noma nje ngezokulingisa esebenzela kweleSouth Africa. Othanda ukujabula kule iviki nansi ingxoxo enambithekayo phakathi kukaNondulo Ngwenya (NN) lentatheli yephephandaba likazulu uCornelius Luphahla (CL).
CL: Uzulu uthanda ukwazi ukuthi ngubani uNondulo Ngwenya njalo kungani wakhetha ezemidlalo yobulingisi?
NN: Mina ngiyintombi edabuka eGwanda koMthwakazi. Ezemidlalo yobulingisi ngaziqalisa ngesikhathi ngisasesikolo kodwa okwakhathesi ngidlala emdlalweni othiwa Madlela Skhobokhobo. Emdlalweni lo ngibizwa ngokuthi nginguMastanda njalo ngaqalisa ukudlala kulo umdlalo ngesikhathi uqalisa.
CL: Abantu bathini ngomsebenzi wakho ntombendala njalo ukhangelele ukubajabulisa ngani?
NN: Abantu bayawuthakazelela kakhulu umsebenzi wami engiwenzayo njalo bangikhuthaza ukuthi ngiqhubekele phambili ngibajabulisa. Ngalokhu ngizaqhubeka ngibadlalela kuhle kuyo yonke imidlalo engizaphatheka kuyo.
CL: Lokhu waqalisa ezemidlalo sowathola mvuzo bani ntombi yakoSitshela?
NN: Njengomuntu obedlala kakhulu kweliphetsheya kangikatholi indondo kuleli kodwa khathesi ngikhethiwe ukuba ngomunye wabancintisana kuBulawayo Arts Awards. Ngalokhu ngilethemba lokuthi yikho engizathola khona indondo kwezemidlalo.
CL: Ngaphandle kokujabulisa uzulu kwezemidlalo yobulingisi msebenzi bani owenzayo?
NN: Ngaphandle kokuba ngumdlali wezobulingisi ngisebenza e-Abattoir kweleSouth Africa.
CL: Ukuba ngumdlali wobulingisi kungabe kuletha inguquko esimilweni sakho kumbe cha?
NN: Ukuba ngumdlali wobulingisi mina akungiguquli isimilo sami ngoba ngesikhathi ngisemdlalweni ngiba lesinye isimilo esehlukene kakhulu lalesi engiyiso sona. Ngakho ukuba ngumdlali lokhu ngikuphatha njengokuthi kungumdlalo yikho kungangiguduli.
CL: Bunzima bani oyake uhlangane labo kwezokujabulisa uzulu ngobulingisi?
NN: Ubunzima engiyake ngihlangane labo kwezemidlalo yobulingisi yikuthi umsebenzi lo awusiniki imali eyenelisa ukusiphilisa njengabadlali ngoba abanye abantu bayasintshontshela imidlalo yethu. Okunye njalo kunzima ukuthi usebenze ubulingisi ngapha usebenza omunye umsebenzi.
Ngalokhu bengifisa ukuthi ngabe imali iyathuthuka kwezobulingisi ukuze ngenelise ukuziphilisa ngobulingisi ngitshiye ukusebenza okunye. Lokhu kungadala njalo ukuthi ngithuthuke kwezemidlalo ngoba ngizabe sengilesikhathi eseneleyo.
CL: Nkuthazo bani oyipha abaculi kanye labadlali abasacathula kwezokujabulisa uzulu?
NN: Kubadlali kanye lakubaculi abasasungula ngithi kababambelele kwezokujabulisa uzulu uzulu loba kunzima. Okunye njalo ngithi kabahloniphe uzulu benze imisebenzi elemfundiso emphakathini.
